L’ôtra demindze, l’é oyu la mècha din on bi mohyi d’ouna bala vela, in Franthe. Prà dè mondo, di prithre è di chêrvin dè mècha; ma adon le kà… mon Diu, mon Diu! Ouna punya dè dzin, dza bin màrè. Di pourè vouê ègrelètè, le nâ din la foye. Le dirèkteu menâvè lè bré din le vudyo, nyon le vouityivè. L’é adon moujâ a la tsanthe ke no j’an din nouthron tyinton. Vouéro dè chochyètâ dè mujika, dè tsan è dè téâtro no j’an din nouthrè velâdzo. Ti lè dèvêlené lè châlè chon okupâyè pê lè rèpètichyon. N’in fô ouna po lè tsantre, oun’ôtra po la mujika, na trèjima po lè rèpètichyon dè téâtro. L’è pâ bi chin?
Di konpojiteu ke pâchon di j’àrè a lou pyanô . DI j’ôteu ke pâchon di né byantsè in chè krojin lè charvalè po trovâ ôtyè dè vayâbio ! Di j’akteu ke l’an travayi to le dzoua è ke van pachâ demi la né a rèkordâ lou rôle. Ditè-mè pâ ke chin l’è di j’amateu! To chi mondo ke no j’inkotsè di balè tsoujè, di tsoujè ke no j’akutèrin avu pyiéji , chin oubyâ le travô ke l’an bayi!
Adon, l’evê k’arouvè, no bayè l’èpâhyo, totè lè fin dè chenannè, d’alâ, pê lè velâdzo, lè j’akutâ è lè j’inkoradji. A La Toua, l’i arè ouna Badyèta ke farè di j’èpèluvè, on dzouno konpojiteu è di mujichyin dè rèthèta ke van no j’intrètsantâ. Dou téâtro patê de la pâ dè Vuthêrnin. È n’in d’a mé, konchultâdè lè gajètè, pu rèyidè. L’è pâ de la tsanthe chin? Anne Marie Yerly
Chant et musique
L’autre dimanche, j’ai entendu la messe dans une belle église d’une belle ville de France. Beaucoup de monde, des prêtres, des enfants de chœur; mais alors la chorale… mon Dieu, mon Dieu! Une poignée de personnes déjà bien mûres. De pauvres voix aigrelettes, le nez dans la partition. Le directeur agitait ses bras dans le vide, personne ne le regardait.
J’ai alors pensé a la chance que nous avons dans notre canton. Combien de sociétés de chant, de musique et de théâtre avons-nous dans nos villages. Tous les soirs, les salles sont occupées par les répétitions. Il en faut une pour les chanteurs, une autre pour la musique, une troisième pour les répétitions de théâtre. Ce n’est pas beau ça?
Des compositeurs qui passent des heures au piano. Des auteurs qui passent des nuits blanches à se creuser les cervelles afin de trouver quelque chose de convenable. Des acteurs qui ont travaillé tout le jour et vont passer la moitié de la nuit a apprendre leur rôle. Ne me dites pas que ce sont des amateurs. Tout ce monde qui nous prépare de belles choses, des choses que nous écouterons avec plaisir, sans oublier le travail qu’elles ont donné!
Alors, l’hiver qui arrive, nous donne l’occasion, toutes les fins de semaines, d’aller dans les villages, les écouter et les encourager. A La Tour, il y aura une Baguette qui va faire des étincelles en compagnie d’un jeune compositeur et de musiciens chevronnés, ils vont nous enchanter. Du théâtre patois du côté de Vuisternens. Et il y en a plus, consultez les journaux et choisissez. Ce n’est pas de la chance ça? Anne Marie Yerly