Chin fâ dza on mê ke la rindya a Èrbivouè l’è pachâye. Po n’in rèvinyi a ha bala kothema, prà dè dzin dè l’Intyamon chè chovinyon dè dou modzenê - li-ya dè chin mé dè vint’an - ke fajan l’atrakchyon dè ha rindya. Irè Mamis Castella ke poyivè in Lys è Norbert Dèhyou di j’Èkojalè. L’avan tsakon lou lota dè vajiyê bin garnyè. Din ha a Mamis on vèyê ginyi ti lè kurtiyâdzo po fére ouna bouna choupa dè tsalè è pindu a la lota le tsoudèron po kouêre chon kâfé nê a la chikoré. Din ha a Norbert, a pâ lè formè po chè motètè, i pindê la lintêrna, lè tsèvèthro è ou dèchu ouna kâja avu duvè dzeniyè. Norbert dèfelâvè achebin avu cha pye bala tchivra byantse.

L’é mé konyu Norbert di j’Èkojalè. L’avê on bi tropi dè tchivrè, fajê di bouné motètè è avê cha prateka. Kan le karbatyé dè Lecho irè a kour dè motètè, i lèvâvè chon gonfanon è Norbert apyéyivè ch’n’èga po chonyi la kemanda. N’irè pâ le tin di «natel» apèdji i j’oroyè! Norbert irè po lè kouârnè i vatsè è chonyivè lè dzovè dè chè modzon. L’è vré k’on tropi dè vatsè avu di kouârnè l’è mé in yuva din ouna rindya. Ma po le richto, tsakon fâ kemin li konvin.

Norbert irè achebin on fin konyechâre di tsavô. I menâvè ch’n’èga to a la parola. Irè achebin konyu di tsamo. In redèchindin dou Vani-Byan, l’é yu on kou Norbert in trin dè hyoure ou dèchu di tsamo. Fô krêre ke faji partya dou dèkouâ.

I fâ tarubyamin dou bin dè chè chovinyi dè chi tin bènirà d’la ya ou tsalè, yô irè bin chur pènâbyo, ma achurâ chan.

Vonvon Kolly

Souvenir de désalpe

Cela fait déjà un mois que la désalpe à Albeuve est passée. Pour en revenir à cette belle coutume, beaucoup de gens de l’Intyamon se souviennent de deux garde-génisses – il y a de cela plus de vingt ans – qui faisaient l’attraction de cette désalpe. C’était Mamis Castella qui alpait En Lys et Norbert Descloux des Èkojalè. Ils avaient chacun leur hotte de garde-génisses bien garnies. Dans celle de Mamis on voyait guigner tous les légumes pour faire une bonne soupe de chalet, et pendu à la hotte le chaudron pour cuire son café noir à la chicorée. Dans celle de Norbert, à part les formes pour ses tommes, y pendaient la lanterne, les licols et au-dessus une cage avec deux poules. Norbert défilait aussi avec sa plus belle chèvre blanche.

J’ai mieux connu Norbert des Èkojalè. Il avait un beau troupeau de chèvres, faisait de bonnes tommes et avait sa clientèle. Quand le cafetier de Lessoc était à court de tommes, il levait son drapeau et Norbert attelait sa jument pour soigner la commande. Ce n’était pas le temps des «natel» collés aux oreilles! Norbert était pour les cornes aux vaches et soignait les guides-cornes de ses génisses. C’est vrai qu’un troupeau de vaches avec des cornes est plus en vue dans une désalpe. Mais pour le reste, chacun fait ce qui lui convient.

Norbert était aussi un fin connaisseur de chevaux. Il menait sa jument à la parole. Il était aussi connu des chamois. En redescendant du Vanil-Blanc, j’ai vu une fois Norbert en train de clôturer au-dessus des chamois. Il faut croire qu’il faisait partie du décor.

Cela fait terriblement du bien de se souvenir de ce temps béni de la vie au chalet, où c’était bien sûr pénible, mais assurément sain.

Vonvon Kolly