Fô ithre ou mintè viyo kemin mè po ch’in chovinyi. L’ichtouâre ke vé vo kontâ vo bayèrè la pràva ke no j’iran pâ ti dè j’andzè, in chi tin.

Mile nou-thin thinkant’è chate; ché pâ-mé che l’è l’Èvètyè, a chi momin Monchênyeu Tsarêre, ou bin lè prithre di parotsè, ke l’avan dèchidâ dè promenâ Nouthra Dona di Mârtsè a travê le tyinton. In prochèchyon d’ouna parotse a oun’ôtra. Di dzouno portâvan la chtatu. Moncheu dèrê, pu lè chêrvin avu di hyêrdzo. Di chudâ armâ tantyè y din. La chochyètâ dè mujika, la chochyètâ di dzouno, ha di dzounè fiyè, irè pâ tyachon dè mèhyâ to chin. Po fourni lè j’omo, bin chure dèvan, pu lè fèmalè dêrê.

Arouvâ din le mohyi, irè la Mècha, pu di balè prèyirè, di tsan. Anfin, irè fitha po ha bouna Dona di Mârtsè. Ou mi dè fèvrê dè chi l’an, on dèvêlené, i fajê on tin a pâ betâ fro on jandârme, no dêvechin alâ la «rindre» a Pon’na-Vela. Irè vinyête vêr-no du Arkonhyi.

A travê le bou dè Pènihyé, in pakotin din la tchiafa, no l’i chin arouvâ, in prochèchyon, chin tru dè mô. Ma adon, la rintrâye! No j’ôtro, dzouno è fiyè no j’an pa â oubyâ dè pachâ a L’infan-dou-Bon-Kà, grantin. No j’an tsantâ, grantin, no j’an troyi, grantin è prà. Din la tchiafa no chin rintrâ bra-dèchu, bra-dèjo, avu la bènèdikchyon dè Nouthra Dona di Mârtsè.

Anne Marie Yerly

Un joyeux pèlerinage

Il faut être au moins aussi vieux que moi pour s’en souvenir. L’histoire que je vais vous raconter vous donnera la preuve que nous n’étions pas tous des anges, en ce temps-là.

1957; je ne sais plus si c’est l’évêque (à ce moment-là Mgr Charrière) ou les prêtre des paroisses, qui avaient décidé de promener Notre-Dame des Marches à travers le canton en procession d’une paroisse à l’autre. Des jeunes gens portaient la statue. Le curé derrière, puis les servants avec des cierges. Des soldats, armés jusqu’aux dents. La société de Musique, la société des jeunes gens, celle des jeunes filles (il n’était pas question de mettre tout ça ensemble). Pour finir, les hommes, bien sur devant, puis les femmes derrière.

Arrivés dans l’église, c’était la messe, puis de belles prières, des chants. Enfin c’était la fête pour cette bonne Dame des Marches. Au mois de février de cette année-là, un soir, il faisait un temps à ne pas mettre un gendarme dehors, nous devions aller la ramener à Pont-la-Ville. Elle était venue chez nous d’Arconciel.

A travers le bois de Péniclé, en pataugeant dans la neige fondue, nous y sommes arrivés, en procession, sans trop de mal. Mais alors, la rentrée! Nous autres filles et garçons nous n’avons pas oublié de passer à L’Enfant-de-Bon-Cœur, longtemps. Nous avons chanté, longtemps. Nous avons bu, longtemps et beaucoup. Dans la neige fondue nous sommes rentrés bras-dessus bras-dessous, avec la bénédiction de Notre-Dame des Marches.

Anne Marie Yerly