Dèvejâ dou bredzon chin moujâ ou dzakiyon, i richkè bin dè fére drèhyi lè pê chu la titha di «fèminichte».

Lè moudè chon bal-è-bin kemin lè damè: i tsandzon chovin! Din le viyo tin le dzakiyon irè rintyè la roba. Ouna chinpya roba dè mi-fi ou bin in koton. L’avan rin dè mandzè. Le hô irè bin charâ, ma le bâ irè anpyo è i dèchindê gayâ tantyè i geriyè. Chè kotâvè par dèvan è i krijivè prèvon, pêrmo ke kan la dama i atindê on poupon, fayi kan mimo povê kotâ chon dzakiyon. È lè gârda-roba iran pâ tsouhyi dè j’âyon. Lè pye rètse, n’in d’avan yon po la demindze, in chêya, ma irè bin râ.

Lè mandzè ke no j’an ou dzoua d’ora chon pye galéjè tyè hà dè chi tin. Irè rintyè lè mandzè de la tsemije. Di grôchè tsemijè in koton, di kou in tsenèvo. I rabrachivan on bokon lè grantè mandzè …ma pâ tru, la dinyitâ…atinhyio! Lè ganechon chon arouvâ piti a piti, ma bin chovin, n’in betâvan rin. Fô pâ oubyâ ke la buya chè fajê tyè on kou ou dou pêr-an.

Le fourdâ chè portâvè totavi. On pye galé po la demindze, a bâvèri. Lè dzelôvrê, on to chinpyo, pâ tru kontchà. Pu adon fô pâ oubyâ le motchà dè kou. L’i dejan, chuvin yô le «motchu-duchu. Chin irè a kouja dou chèlà, fayê ithre bala, è biantse!»

Anne Marie Yerly

Dzaquillon

Parler du bredzon sans penser au dzaquillon risque bien de faire dresser les cheveux sur la tête des féminstes.

Les modes sont un peu comme les dames: elles changent souvent. Dans le vieux temps le dzaquillon n’était que la robe. Une simple robe de mi-fil ou de coton. Elles n’avaient pas de manches. Le haut était bien serré, mais le bas était ample et descendait presque jusqu’aux chevilles. Il se fermait devant, croisant bien profondément, car, lorsque la dame attenait un bébé, il fallait quand même pouvoir fermer sa robe. Les armoires n’étaient pas bourrées de vêtements. Les plus riches en avaient un pour le dimanche, en soie, mais c’était bien rare.

Les manches que nous avons aujourd’hui sont plus jolies que celles de ce temps-là. Ce n’était que les manches de la chemise. De grandes chemises de coton, parfois en chanvre. Elles retroussaient un peu ces grandes manches… mais pas trop… la dignité… attention! Les culottes sont arrivées petit à petit, mais bien souvent, elles n’en mettaient pas du tout. Il ne faut pas oublier que la lessive ne se faisait qu’une à deux fois par année.

Le tablier se portait toujours. Un plus joli pour le dimanche, à bavette. Les jours d’œuvre, un tout simple, pas trop salissant. Et puis le foulard. On l’appelait à certains endroits, le mouchoir à mettre par-dessus. Ce dernier protégeait du soleil, il fallait être belle, et blanche!

Anne Marie Yerly