On piti bondzoua
On piti mo fachilo a dre. On chunyo d’amihyâ ke bayè rin dè pêna è ke fâ pyiéji. Din lè velâdzo, chè dyon bondzoua l’è la kothema, anfin l’è na kothema ke keminthè a chè pêdre; l’è bin damâdzo.
Din le rèyèmin di j’èkoulè, vêr no, i rèkemandon i j’infan dè chaluâ lè dzin ke rinkontron in tsemin. Le fan gayâ ti. Ma, i fô lou rèpondre, raoudzê!
Bin chure ke l’è pâ-mé kemin on yâdzo, ke to le mondo irè gayâ dè parin, lè dzin chè konyechan. Ora, l’i a di novi chitoyin, ke vinyon du la vela poutithre. È bin djuchtamin, l’è l’okajyon dè fére konyechanthe, toparê!
L’è pâ oun’afére dè rèchpè po lè grôchè dzin, ou bin po lè j’anhyan, l’è djuchto on piti mo dè binvinyête a to le mondo, on fôri, pu l’è to.
ANNE MARIE YERLY
Ecoutez cet article en français et en patois sur …