L’i a dza mé dè chouchant’an, Hélène Brodâ, la chèra a l’abé Jêvié, l’avê èkri ouna galéja poéji «Kan lè fèmalè vôtèron». I chè moujâvè ke chin porè pâ arouvâ tan vuto. Irè pâ maryâye, è mè krêyo bin ke li-mima, l’avê a pêna invide d’alâ vôtâ.

L’inchtruchyon Civique, irè rintyè po lè bouébo. Lè fiyè è la politike… nyon n’in dèvejâvè. Ma, krêdè-mè, prà dè fèmalè bayivan kan mimo di bon konchèye a lou j’omo. Chuvin tyin, iran pâ tan chuti, n’in d’avê mimamin dè hou ke chavan pâ yêre. Adon, nejoué inpyâvè lè bultin? Madama! La fèna motse l’i èkrijê chin ke volê. Pu, moncheu alâvè vôtâ, cholè, to gonhyo d’orgouè. I rintrâvè, on bokon chou, in rètâ po goutâ… to irè prè chu la trâbya.

Din le tin, kemin ou dzoua d’ora, l’i a pâ tyè di fèmalè mômenâyè. Fô rintyè chavê chè fére a rèchpèktâ, to in…