Deché-delé

Ma poura tè! L’orgouè mônè dè l’êrdzin t’arê-the fê a katenâ? L’i a rin grantin, a l’intrâye, on vêyê onkora di galé modzon patherâ alêgramin. Pê mâlà, vouè, di dzin ke chon inkrâyè din l’êrdzin, l’an dèchidâ dè tè rènovalâ. L’an fotu bâ di galé kartchi, l’an avutrâ di galéjè kotsè dè toupa. Krin-krà l’an fotu bâ di j’âbro. Bin chur, kemin i dyon: «No lè rèpyantèrin.»

Ma, an-the moujâ a vouéro dè j’an on âbrelè l’a fôta po betâ a chokrê ouna niya d’ojalè?

A ti hou novi kartchi l’an bayi di non intrètsantâre: «les jardins de la Pâla», «le portail de Bulle», «le cœur de La Tour» è adi-apri … l’an mimamin dèchidâ dè rèfére la gâre. Toparê, tyinta gâre! Ôtyè a fére a bavâ d’invide ouna «mégapole». Borâye dè magajin ke chàbrèron ourâ la demindze è ti lè dèvêlenè tantyè a djij’arè.…