Kan no j’alâvan a l’èkoula, po di dzin dè m’n’âdzo, le tyindzè dè juin irè on dzoa bènirà. Irè le premi dzoua di vakanthè è achebin le momin dè fére lè fin, kan le tin irè ou bi. Fo dre ke din chi tin on atindi ke le fin chi mà è on faji duvè kopè: lè fin è lè rèkouâ.

Ora, on keminthè dza lè premire chenannè dè mé, ma chti yan, l’a fê tru frê è l’è tyè lè dêri dzoua dè mé è lè premi dè juin k’a-poupri to l’è j’ou rèvou. Din le tin fayi dou mondo po fére lè fin. Prou chovin, lè mochi iran inko chèyi a la fô. Apri chin fayi dèjandanyi, veri ou rathi ou bin a la fortse. E pu kan le fin irè chè, fére lè rouvon, a dou ou trè è achebin mé, avu lè rathi, dèvan dè ramachâ.

Po rintrâ le fin a la grandze, on apyèyivè l’èga ou tsê a pon oubin a panêre. Kemin bouébo, chu chovin jou bayi on kou dè man a di vejin, po tinyi l’èga, tséthi lè tavan, è bramâ: «Tin-tè» a chi ke faji le tsê, dèvan d’avanhyi.

Avu on trakteu apyèyi chovin a tsatchyè machinè, ora lè j’afére van bin pye rido è lè fin chè fan in rin dè tin. A la grandze, pâ mé fotâ d’alâ kunyi le fin dèjo lè tyolè.

Kemin chovinyi, i mè révin onko le chon dou bidon a foumêre k’on betâvé déjo le bori dou tsavô po rèpudyi la gravalâ dè tavan, chovin grô. On kou, a Tsarmê, kôkon l’a bin de: «Chti yan, lè tavan iran ache grô tyè lè mouanô.»

Vonvon Kolly

Les foins

Quand on allait à l’école, pour des gens de mon âge, le quinze de juin était un jour béni. C’était le premier jour des vacances et aussi le moment de faire les foins, quand le temps était au beau. Il faut dire que dans ce temps on attendait que le foin soit mûr et on faisait deux coupes: les foins et les regains.

Maintenant on commence déjà les premières semaines de mai, mais cette année, il a fait trop froid et c’est seulement des derniers jours de mai et les premiers de juin qu’à peu près tout a été rentré. Dans le temps, il fallait du monde pour faire les foins. Souvent encore, les morceaux étaient fauchés à la faux. Après ça, il fallait défaire les andins, tourner au râteau ou à la fourche. Et puis, quand le foin était sec, faire les «tires», à deux ou trois et même plus, avec le râteau, avant de ramasser.

Pour rentrer le foin à la grange, on attelait la jument au char à pont ou à ridelles. Comme garçon, j’ai souvent été donner un coup de main à des voisins, pour tenir la jument, chasser les taons et crier: «Tiens-toi» à celui qui faisait le char, avant d’avancer.

Avec un tracteur attelé souvent à chaque machine, maintenant les affaires vont beaucoup plus vite et les foins se font en peu de temps. A la grange, plus besoin d’aller serrer le foin sous les tuiles.

Comme souvenir, il me revient encore l’odeur du bidon à fumée qu’on mettait sous le collier du cheval, pour chasser les nuées de taons, souvent gros. Une fois, à Charmey, quelqu’un a bien dit: «Cette année, les taons étaient aussi gros que des moineaux».

Vonvon Kolly