Anfin, i chinbyè ke l’afére chè vou apéji. No van dyora povê rè-alâ bêre on vêro chin krinte din lè kabarè. Pê bouneu po lè kabaretyé, ke l’an teri la linvoua du tan grantin. Lè téâtro, lè cinèma, lè j’athinbyâyè, van dyora, che to va bin, rè-ourâ lou pouârtè. Ma, bin chure, pâ n’inpouârtè kemin, fudrè chobrâ prudin.

Le pye alêgro, l’è ke ti lè j’amateu dè tsan van rèprindre ya, è rèprindre è lou j’aktivitâ. On dzoua chin tsantâ, l’è kemin on dzoua chin pan. No j’an bin èprovâ dè fére on bokon dè tèlè-travô; vêr-no, no j’an aprê ouna mècha dè Mozart po Tsalandè dou-mile vin, è bin, bèrnike no l’an pâ tsantâye. Cherè poutithre po l’an ke vin.

On payi ke tsantè pâ l’è on payi murechin. Kan on moujè a totè lè chochyètâ dè tsan ke l’i a din le tyinton, cherè bin damâdzo dè dèjèchpèrâ. Na, le chèlà l’è totavi rèvinyê.

Le dzoua le pye bi, cherè le dzoua yô, no porin bramâ ti inthinbyo, dzoyà: «Bâ lè mâchko!»

Anne Marie Yerly

Chantez

Enfin, il semble que la chose va s’apaiser. Nous allons bientôt pouvoir retourner boire un verre sans crainte dans les cafés. Heureusement pour les tenanciers qui ont tiré la langue depuis si longtemps. Les théâtres, les cinémas, les assemblées, vont bientôt, si tout va bien, rouvrir leurs portes. Mais bien sûr, pas n’importe comment, il faudra rester prudents.

Le plus agréable, c’est que tous les amateurs de chant vont reprendre vie et reprendre leurs activités. Un jour sans chanter c’est comme un jour sans pain. Nous avons bien tenté faire un peu de télé-travail; chez-nous, nous avons appris une messe de Mozart pour Noël 2020, et bien, bernique, nous ne l’avons pas chantée. Ce sera, peut-être pour l’année prochaine.

Un pays qui ne chante pas est un pays mourant. Quand on pense à toutes les sociétés de chants qu’il y a dans le canton, il serait bien dommage de désespérer. Non, le soleil est toujours revenu.

Le jour le plus beau, sera le jour où nous pourrons crier, joyeux tous ensemble: «Bas les masques!»

Anne Marie Yerly