Por avê pachâ katre dzoa è demi a l’èpetô po mè rèfére oun’antse, i mè rèvin on galé chovinyi d’on pachâdzo a l’èpetô dè Riaz, in mil-nouthin thinkantè-nà. In rèdèchindin dè Chorin, chu ma «Vespa», on dzoua dè Bènichon, l’é fê ouna pechinta dzubyâye pri dè vê le bolondji Kaiser. Poutamin inchanyolâ, di vejin m’an menâ a l’èpetô.
I ché pâ portyè, Arthur Gay, chi ke m’avê vindu è retakounâ ma «Vespa», me l’a ramenâye a Riaz, è la rèvouja ou fon d’ouna lodze d’la kura, avu l’akouâ dè Djan Pittet, le tinyâre dou bin.
Môgrâ ke n’iro pâ tan byochi, chin rin dè frèjâ, m’an kan mimo vouèrdâ tyindzè dzoua. Intrè tin, mon vejin dè tsanbra, chè trovâ on dzouno maryâ dè Thèrnya ke ch’innoyivè apri cha dàthe. Chintin ma Vespa pâ bin yin, l’i é propojâ dè fére ouna chorèprêcha a cha dzoun’ èpâja.
On kou a Thèrnya, l’è dèpojâ mon pachadji, ou fon d’on talu, pri dou dari kontoua, a rinda le mohyi. L’é atindu le tin k’la fayu ou mariatson dè fére chon dèvê, ma chin tinyi la tsandêla.
Apri to chin, no chin rintrâ a l’èpetô è nyon no j’a de ôtyè. Ou dzoua d’ora on ari dou mô dé fére ouna paryè fregâtse.
Vonvon
A l’hôpital
Pour avoir passé quatre jours et demi à l’hôpital pour me refaire une hanche, il me revient un joli souvenir d’un passage à l’hôpital de Riaz en 1959. En redescendant de Sorens, sur ma Vespa, un jour de Bénichon, j’ai fait une puissante glissade près de chez le boulanger Kaiser. Serieusement ensanglanté, des voisins m’ont amené à l’hôpital.
Je ne sais pas pourquoi, Arthur Gay, celui qui m’avait vendu et raccommodé ma Vespa, me l’a ramenée à Riaz, et la rangée au fond d’une remise de la cure, avec l’accord de Jean Pittet, le teneur du domaine.
Malgré que je n’étais pas très blessé, sans rien de cassé, on m’a quand même gardé 15 jours. Pendant ce temps, mon voisin de chambre un jeune marié, de Cerniat, s’ennuyait de sa douce. Sentant ma Vespa pas bien loin, je lui ai proposé de faire une surprise à sa jeune épouse.
Une fois à Cerniat, j’ai déposé mon passager au fond d’un talus, près du dernier virage, tout près de l’église. J’ai attendu le temps qu’il a fallu au jeune marié de faire son devoir, mais sans tenir la chandelle.
Après tout cela, nous sommes rentrés à l’hôpital et personne nous a dit quelque chose. Aujourd’hui, on aurait du mal de faire une pareille escapade.
Vonvon