Chin fâ dyora dou j’an ke chi mo dèbèni dè Covid rèvin ti lè dzoua è ke fâ menâ lè marmàlè. Din to chin, i moujo i chochyètà ke l’an du chobrâ mudè, bin kotyè tin è ke l’an ora le korâdzo dè rèprindre, din di kondihyon pâ to le tin fachilo. I moujo a ma chochyètà dè tsan, yô l’é tsantâ mé dè thinkant’an, le kâ dè pèrotse dè Vupin-Machin ke l’a jou le korâdzo dè bayi dariremin on konchê ke l’an dou rinvouyi trè kou. Kemin tan d’ôtro, l’an du mantinyi la hyanma por arouvâ a fére konyèthre lou pachion.

I fô fèlichitâ hou chochyètâ k’lan dza dou mô dè trovâ di novi minbro è ke fan to po mantinyi lè kothemè dou payi.

Po n’in rèvinyi a chi Covid, l’è dyora le momin ke lè dzin konprenichyan ke pou ch’in chayi i fô chè fére a pekâ. Ou novalè dè demindze pachâ, a la «télé», ouna dama dè hyinthe l’a bin chu dre è mothrâ le tsemin d’la chayête.

I moujo a chi pouro Berset ke dê a to momin bayi lè j’ouâdre di j’otoritâ è ke chè fâ mô menâ pè di dzin ke fan to po le dègomâ. Mè chinbyè ke po fére ou mi è moujâ i dzin ke chon outouâ dè ché, l’è dè dyindre i rekemandahyon.

Vonvon Kolly

Cette saleté de Covid

Cela fait bientôt deux ans que ce mot malheureux de Covid revient tous les jours et qui fait parler. Dans tout ça, je pense aux sociétés qui sont restées muettes, bien quelque temps et qui ont maintenant le courage de reprendre, dans des conditions pas toujours faciles. Je pense à ma société de chant, où j’ai chanté plus de 50 ans, le chœur paroissial de Vuippens-Marsens, qui a eu le courage de donner dernièrement un concert qu’ils avaient dû renvoyer trois fois. Comme tant d’autres. ils ont dû maintenir la flamme pour arriver à faire connaître leur passion.

Il faut féliciter ces sociétés qui ont déjà du mal à trouver des nouveaux membres et qui font tout pour maintenir les coutumes du pays.

 Pour en revenir à ce Covid, c’est bientôt le moment que les gens comprennent que pour s’en sortir il faut se faire vacciner. Aux nouvelles de dimanche passé, à la télé, une dame de science a bien su dire et montrer le chemin de sortie.

Je pense à ce pauvre Berset qui doit à tout moment donner les ordres des autorités et qui se fait mal mener par des gens qui font tout pour le destituer. Il me semble que pour faire au mieux et penser aux gens  qui sont autour de soi, il faut obéir aux recomandations.

Vonvon Kolly