Ma vouê, l bin damâdzo dè fayi chè rèjinyi k’Yves è Alexandra Dzatyè l’an pyakâ dè tigni la dyindyèta Vê Boudji, è chin du le dari dechando d’oktôbre. Po lè dzin k’âmon bin martchi, è hou ke chè chinton bin pri di montanyè, chi galé tsalè irè to trovâ po prindre ‘na mouâcha. Avu la choupa dè tsalè, lè makaron, la tsanbèta, lè krothè ou fro, la fondya, on rètrovâvé chin ke no j’anhyan l’avan chovin chu la trâbya. Ma, achèjenâ a la mouda d’ora.

Dèvan dè tchithâ chi bi tsalè d’la Djithe d’Avô, Yves va no mothra ke l’a onko bin di chorèprêchè din chon cha. Apri chon l’akchidin kan irè forthê din lè dzà d’Ethavanin, li a fayu trovâ on travô min pènâbyo è lè dinche ke chè rètrovâ éde-infirmyé a l’èpetô dè Machin. Dè to tin, Yves l’a jou on n’yè aviji chu cha bala kotse d’la Grevire. L’è dinche ke chè betâ a krokâ chu la têla di payijâdzo, di méjon, di tsalè, di féni é tan d’ôtrè balè antityitâ dou payi. Prâ dè hou bi tablô chon dza adôdji chu lè parê dou vindâdzo.

Dou thin ou trèdzo dè novanbre, la dyindyèta Vê Boudji va onko ithre rèjèrvâye a oun’èchpojichyon d’ouna karantanna dè bi travô dè chi l’artichte d’intche-no, ke l’a a-nom Yves Dzatyè. Chin bayèrè l’èpâhyo a ti lè j’èmi d’la famiye dè li bayi a chintre to le bouneu ke l’a chènâ outouâ dè li, dji j’an dè tin.

Vonvon

C’est bien dommage

Mais oui, c’est bien dommage de falloir se résigner que Yves et Alexandra Jaquet ont cessé de tenir la buvette Chez Boudji, et cela depuis le dernier samedi d’octobre. Pour les gens qui aiment bien marcher et ceux qui se sentent bien près des montagnes, ce joli chalet était tout trouvé pour aller manger. Avec la soupe de chalet, les macaronis, le jambon, les croutes au fromage, les fondues, on retrouvait ce que nous ancêtres avaient souvent sur la table. Mais, assaisonné à la mode actuelle.

Avant de quitter ce beau chalet de la Gite d’Avô, Yves va nous montrer qu’il a encore bien des surprises dans son sac. Après son accident quand il était forestier dans les forêts d’Estavannens, il lui fallu trouver un travail moins pénible et c’est comme ça qu’il s’est retrouvé aide-infirmier à l’hôpital de Marsens. De tout temps, Yves eut un œil avisé sur sa belle région de la Gruyère. C’est ainsi qu’il s’est mis à reproduire sur la toile des paysages, des maisons, des chalets, des fenils et tant d’autres belles antiquités du pays. Beaucoup de ces beaux tableaux sont déjà accrochés sur les parois de la salle à boire.

Du 5 au 13 novembre, la buvette Chez Boudji sera réservée à une exposition d’une quarantaine des beaux travaux de cet artiste de chez nous, qui s’appelle Yves Jaquet. Cela donnera l’occasion à tous les amis de la famille, de lui exprimer tout le bonheur qu’elle a semé autour d’elle, durant 10 ans.

Vonvon