Che vo vouityidè le mo trin chu le dikchenéro patê, vo j’alâdè trovâ on mache dè drôlèrâ. L’i a la fortse a trè din po tsardji le fin, le tsemin dè fê, le trin dè nothè, è adi apri.

Vo puédè menâ le trin dè prà dè fathon: po vo dèmorâ, po fére a la dèvàra, po tsêrtchi nyéje a vouthron vejin… è mimamin por ithe infidélo a vouthron vejin ou bin a vouthra vejina dè payéche.

Menâ gran trin l’è achebin vivre ou dèchu dè chè moyin in fajin la nothe, la ribote, è to por on kou chè retrovâ patinku. Chè betâ in trin, l’è chè betâ in minâdzo, inke ôtyè dè dza dè pye rèjenâbio.

Nouthrè j’otoritâ l’an a kà dè no bayi di bon moyin dè no dèpyathi, ke chi por alâ ou travô ou bin no promenâ.

È bin, chédè-vo? Lè CFF anfin, l’an fê on grô l’èfouâ: nouthrè tsemin dè fê Fèdèrô, l’an kan mimo dèchidâ dè léchi ouna fèmala menâ lè trin. Du j’ora in léva, la chèkuritâ l’è achurâye!

Anne Marie Yerly

Mener le train

Si vous voyez le mot train sur le dictionnaire patois, vous allez trouver une quantité de drôleries. Il y a la fourche à trois dents pour charger le foin, le chemin de fer, et le «train de noces», et ainsi de suite.

Vous pouvez «mener le train» de bien des façons: pour s’amuser, pour se mal conduire, pour chercher noise à son voisin… et même pour être infidèle à votre voisin ou votre voisine de paillasse.

Mener grand train c’est aussi vivre au-dessus de ses moyens en faisant la noce, la ribote, et tout à coup se retrouver miséreux. Se mettre en train, c’est se mettre en ménage, voilà qui est plus raisonnable.

Nos autorités ont à cœur de nous donner de bons moyens de nous déplacer, que ce soit pour aller au travail ou pour nous nous promener.

Et puis savez-vous? Les CFF enfin, ont fait un grand effort: nos Chemins de fer fédéraux, ont quand même décidé de laisser une femme conduire les trains. Dorénavant, la sécurité est assurée.

Anne Marie Yerly