Le mi dè fèvrê l’è arouvâ. La Tsandèlàja è chè pilâ l’è dza pachâye. I chinbyè k’on achin dza on bokon le furi. Vo vo chovinyidè dè fèvrê thinkant’è chê? Janvyé irè jou tru dà, lè dzordi l’avan keminhyi a hyori, pu to por on kou l’evê irè rèpri. Vin a vint’è dou degré déjo zérô, è chin to le mi dè fèvrê.
L’i a dè chin, bin chure, mé dè chaptant’an. No j’ôtro, no j’iran adi dzouno, no j’an chuportâ. Ma kan mimo, on chè rèlèvâvè dè né po rèinmandji on fago amon le forni. Lè pêyo iran pâ ti ètsoudâ. Dèvan d’alâ dremi, no betâvan nouthrè lèvè chu la pyata dou forni. Vêr no, no j’avan di grôchè pêrè pyatè, ke vinyan du la Charna, no lè betâvan din la fornalèta, pu le dèvêlené no lè prenyan d’ato por ètsoudâ on bokon nouthrè linhyu.
Le lathi, la medzaye, lè j’à, no lè betâvan ou pêyo, a l’othô i dzalâvan! Mimamin l’u bènête dou mohyi irè dzalâye, la bènèdikchyon irè frêde, ma, irè tyachon dè l’i alâ.
No j’an pachâ to chin dè bon kà, kan on ch’intin bin , on ch’âmè bin è on chè rètsàdè bin!
Anne Marie Yerly
Févier
Le mois de février est arrivé. La Chandeleur et ses crêpes est déjà passée. Il semble que l’on sent déjà un peu le printemps. Vous vous souvenez de février mille neuf cent cinquante-six ? Janvier avait été trop doux, les vergers avaient commencé à fleurir, puis tout à coup l’hiver était de retour. Vingt à vingt-deux degrés en dessous de zéro, et ça tout le mois de février.
Il y a de cela bien sûr, plus de septante ans. Nous étions encore jeunes, nous avons supporté. Mais quand-même, l’on se relevait pendant la nuit pour remettre un fagot dans le fourneau de molasse. Les chambres n’étaient pas chauffées. Avant d’aller dormir, nous mettions nos duvets sur ce fourneau. Chez nous, nous avions de grandes pierres plates, qui venaient de la Sarine, nous les mettions dans le petit four de ce fourneau, puis le soir nous les prenions avec nous pour réchauffer un peu nos draps.
Le lait, la nourriture, les œufs, nous les mettions dans la chambre de famille, à la cuisine ils gelaient. Même l’eau bénite de l’église était gelée, la bénédiction était froide, mais il était question d’y aller.
Nous avons vécu tout ça de bon cœur, quand on s’entend bien, on s’aime bien et on se réchauffe bien !
Anne Marie Yerly