La natura no fâ di drôlè chorèprêchè. I-vo yu lè dêrbounêrè din nouthrè prâ, chtou dêri tin? I fâ apouêre! Din le viyo tin, no j’avan lè tôpi po to chin ramachâ.
Chovinyidè-vo, dè chin ke kontâvan d’on chêrtin velâdzo, vo deri pâ yô, vo le chédè prà. La kemouna l’avi prê on’omo, ke faji chin adrê. Le dèvêlené i alâvè portâ lè kuvè a la kemouna… irè payi… a la kuva! Poutithre kotyè thantime, pâ vouéro, ma i gânyivè cha ya dinche.
To por on kou, di payjan, on bokon gatoyà, l’an trovâ ke le tôpi, troupâvè tru l’êrba in fajin chon piti travô. Kemin fére, è bin, le Chindike l’a trovâ on boun’idé: l’a akovintâ katro dzouno po le portâ!
Ma, to chin inpatsè pâ lè dêrbon è lè kanpanyol dè chti’an, dè buthâ kemin di fou nouthra poura têra. Di tôpi, n’in d’a rin-mé.
Ma, yô-chon lè tsa? I van rin-mé i tôpè, chon tru bin nourê din lè méjon. Fudrè poutithre chè betâ a alèvâ di renâ!
Anne Marie Yerly
Les taupinières
La nature nous fait de drôles de surprises. Avez-vous vu les taupinières dans nos prés, ces derniers temps? ça fait peur! Dans le vieux temps, nous avions les taupiers pour ramasser tout ça.
Souvenez-vous, de ce qui se racontait au sujet d’un certain village, je ne vous dirai pas où, vous le savez bien. La commune avait engagé un homme, qui faisait ça parfaitement. Le soir, il allait, apporter les queues à la commune, il était payé… à la queue! Peut-être quelques centimes, pas grand-chose, mais il gagnait sa vie ainsi.
Tout à coup, des paysans, un peu chatouilleux, ont trouvé que le taupier foulait trop l’herbe en faisant son travail. Comment faire, et bien, le syndic a trouvé une très bonne idée: il a engagé quatre jeunes hommes pour le porter!
Mais, tout cela n’empêche pas les campagnols et les taupes de cette année de fabriquer leurs affreuses taupinières, en butant comme des fous notre pauvre terre. Des taupiers, il n’y en a plus.
Mais, où sont les chats? Ils ne vont plus aux taupes, ils sont trop bien nourris dans les maisons. Il faudrait, peut-être, se mettre à élever des renards!
Anne Marie Yerly