Chtou dari tin, avu ti lè projè k’on betè in dèvan po dèvelopâ nouthra bala Grevire, li-ya ôtyè ke dê kan mimo no kroji la titha. Chinbiè ke lè milyon arouvon d’on bokon parto, ma a Pon’na-Vela, lè «Chinois» l’an dou mô dè léchi chayi lou j’èku. On konprin, li-yan dza proumatêre dè fré avu lè «jeux Olympiques». Chi projè, a la ruva dou lé d’la Grevire, fâ tatse avu chè j’ôtel è chè lodzèmin dè vakanthè po di dzin bin dotchi. I ché pâ tru chin ke lè dzin d’la kotse n’in moujon. Ma, po le momin, le pochyin l’è d’arouvâ a Pon’na-Vela. La route vê le barâdzo dè Rochin l’è chovin bohyâ è ché pâ che le tyinton l’è tan prèchâ dè chayi cha bocha.
No j’an la tsanthe dè chobrâ din ouna bala kotse, ma le dondji l’è ke lè promoteu ch’on a la ruva d’la défigurâ. Lè j’otoritâ l’an afére dè to chin dèbortoyi.
To l’è pâ a dègrelandâ. Chin ke la Méjon Cailler è chè j’alintoua van ateri dè mondo a Broc n’è pâ a dèginyi. In trin, du Bêrna, lè dzin l’an l’èpâhyo d’arouvâ in Grevire d’on tré. Chin l’è ôtyé d’afriyindà è to le mondo va poui in profitâ.
Vo vêdè ke fô kan mimo krêre a on n’avinyi rèjenâbyo po nouthra Grevire. Van pâ no j’inlèvâ la yuva chu nouthrè vani.
Vonvon Kolly
La Gruyère de demain
Ces derniers temps, avec tous les projets qu’on met en avant pour développer notre belle Gruyère, il y a quelque chose qui doit quand même nous inquiéter. Il semble que les millions arrivent d’un peu partout, mais à Pont-la-Ville, les Chinois ont du mal à laisser sortir leurs écus. On comprend, ils ont déjà assez de frais avec les Jeux Olympiques. Ce projet, au bord du lac de la Gruyère, fait tache avec ses hôtels et ses logements de vacances pour des gens fortunés. Je ne sais pas trop ce que les gens de la région en pensent. Mais, pour le moment, le souci c’est d’arriver à Pont-la-Vile. La route vers le barrage de Rossens est souvent bouclée et je ne sais pas si le canton est tant pressé de sortir sa bourse.
Nous avons la chance d’habiter dans une belle région, mais le danger est que les promoteurs sont près de la défigurer. Les autorités ont affaire de tout ça démêler.
Tout n’est pas à dénigrer. Ce que la Maison Cailler et ses alentours vont attirer de monde à Broc, n’est pas à dédaigner. En train, de Berne, les gens ont la possibilité d’arriver en Gruyère d’un trait. Cela est quelque chose d’attirant et tout le monde va pouvoir en profiter.
Vous voyez qu’il faut quand même croire à un avenir raisonnable pour notre Gruyère. Ils vont pas nous enlever la vue sur nos vanils.
Vonvon Kolly