Chédè-vo chin ke l’è on an dè breje-vire? È bin, le chavé pâ panyi. L’è Dzojè ke m’a kontâ chin. On an dè breje-vire rèvin ti l’è katre an. L’è on an yô le mi dè fèvrê l’a on dzoua dèpye. Portyè? M’in vé pâ vo vére ‘na lethon dè gèografi… Po fére chinpyo, l’è po ke la Têra chè rèbetichè a dzoua po veri ou toua dou chèlà.

On an dè breje-vire, le mi dè fèvrê kontè vintè-nou dzoua. I ché pâ che ti hou ke chon vinyê ou mondo chi dzoua inke fithon lou j’anivèrchéro ti lè katre an, ma pout-ithre ke puyon divijâ l’âdzo pê katro!

Chti an no j’an on dzoua dèpye. Adon, tyè fére d’on dzoua dèpye? On pou ne pâ li moujâ è fére kemin d’abetuda. Ma on pou achebin chè dre, on kou din l’an, è bin i vé prindre on dzoua po fére ôtyè ke féjo djamé. Por alâ trovâ kôkon, por alâ fére ouna pitita verya, po fére dè l’ouâdre a la méjon, po profitâ dè chon tinyèmin ou bin alâ chè promenâ avui kôkon ou bin cholè, bêre on vêro, vouityi di galé payijâdzo, la natura, …

N’in d’a ke van pout-ithre dre, “l’è pâ pachke no j’an on dzoua dèpye ke fô pêrdre chon tin…” Ma di kou, pêrdre on bokon dè chon tin po fére a pyéji a kôkon ou to chinpyamin chè fére a pyéji, è bin l’è le mèyou moyin dè n’in gânyi!

Romain Pittet

Une année bissextile

Savez-vous ce qu’est “On an dè breje-vire”? Et bien, je ne le savais pas non plus. C’est Dzojè qui m’a raconté ça.

“On an dè breje-vire” revient tous les quatre ans. C’est une année où le mois de février à un jour de plus. Pourquoi? Je vais pas vous faire une leçon de géographie… Pour faire simple, c’est pour que la Terre se remette à jour pour tourner autour du soleil.

« On an dè breje-vire », le mois de février compte 29 jours. Je ne sais pas si tous ceux qui sont venus au monde ce jour-là fêtent leur anniversaire tous les 4 ans, mais peut-être qu’ils peuvent diviser l’âge par 4!

Cette année, nous avons un jour de plus. Alors que faire d’un jour de plus ? On peut ne pas y penser et faire comme d’habitude. Mais on peut aussi se dire, une fois dans l’année, et bien je vais prendre un jour pour faire quelque chose que je ne fais jamais. Pour aller trouver quelqu’un, pour aller faire une petite virée, pour faire de l’ordre à la maison, profiter de son chez-soi ou bien aller se promener avec quelqu’un ou bien seul, boire un verre, regarder des beaux paysages, la nature, …

Il y en a qui vont peut-être dire: «c’est pas parce qu’on a un jour de plus qu’il faut perdre son temps…» Mais parfois, perdre un peu de son temps pour faire plaisir à quelqu’un ou tout simplement se faire plaisir, c’est la meilleure façon d’en gagner!

Romain Pittet