La Monche l’è chituâye pâ bin yin dou velâdzo dè Tsêrmê, l’è on bin galé l’indrê po na chayête. Dutrè chindê a travê patyi è dzorètè, no bayon l’invide de l’y alâ fére na verya. On dè hou tsemin pâchè pê lè tsalè de la Frachèta è dou Gonti; on chèkon prin drê apri Lodzèta a huchta de la route; on trèjimo a kotyè than thinkanta mêtre dou Piti Lyinthon è on ôtro du dêrê, on tro amon Mothèlon, pê le tsemin di j’Échê.

Ha tsapala l’è cholidamin inkrâye chu la frètha ke no j’amênè ou tsalè de la Monche. L’è dèdyâye a Chin Franthê d’Assises, è l’è j’àva èdifyâye ou dèbu dou dji-j’è chatyimo chièkle a l’inichyativa d’on chêrtin Franthê Galley.

«Djan, derin mé de na trintanna dè j’an, t’èthé chon boun’ andze gardyin. Derin to chi tin, vouéro dè kou t’i montâ? Te l’è j’â pâ kontâ, ma chin farè chure bin kotyè tsapalè. Totè lè chêjon a pâ l’evê, l’y avê ôtyè a fére. Ha tsapala, apri ch’ithre indremête to l’evê; adon le furi, fayê l’i inkotyi le gran minâdzo. To chin tinyi poupro. Le premi pochyin in arouvin, irè dè rathalâ la foye dèjo le tiyo, ke l’a bin cha pyathe dèvan la tsapala ma ke bayè on puchin travô. Kan l’è pâ l’outon l’è drê apri la fonta de la nê, achtou ke l’è bon èchouè.

Noutron dèvouâ chêrvin l’i a betâ to chon kà, avu le pochyin di balè tsoujè è dou travô bin fê. Djan! La pèrotse l’a pu chè rèfyâ chu tè. Din l’onbro, chovin in cholitéro è pê ti lè tin, t’i montâ a la Monche. T’avé a kà dè prèjêrvâ chi bi tèmouin dè nouthra kulture è dè nouthron galé payi, la Grevire.

To pri de la tsapala, on piti ban dèjo le tiyo, no j’invitè a prindre na vouèrbèta din la tyêja de la montanye. A dou thin mêtre, le tsalè de la Monche, le pye viyo dou tyinto, è chu la fritha l’y a na bala yuva chu Tsêrmê è Thèrnya.

Koujin Djan, omo de la têra, t’â djêmé dèjarmâ, djêmé béchi lè bré. Tyin bi l’ègjonpio dè konhyinthe. Avu le Patron de l’indrê, Chin Franthê, mêrthi Djan, dè t’ithre dèvouâ ache grantin, chin rèdèbantchi.

Gérard Rime a Tônon. Tsêrmê.