Din lè j’an thinkanta, irè pâ rin dè «fére dou chki». No j’iran pâ ékipâ kemin ora. Mè, l’avé lè chki a mon frârè, tru gran è pèjan. Lè botè achebin iran a li, dou numèrô dè tru; dou pâ dè pyalè bin èpè, fajan l’afére.

No j’avan dza to chin ke fayê a la Berra: on tire-metsè formidâbyo. La pichta nêre irè rèjêrvâye po lè krake, lè dzouno don! No j’ôtrè, avu nouthron bounè trikotâ mima, ouna «windjacke» è di tsôthè «fuseau», no j’avan pou d’èlèganthe. Ma, pouârtè rin, no j’alâvan po no dèmorâ è achebin on bokon po gugâ lè dzouno.

Le pye difichilo irè d’avê le drê dè modâ de la méjon. Lè parin iran chèvéro. No j’an chovin trovâ di bounè réjon po ch’èchknâ la demindze dumidzoua. Ouna dzouna fiye, bin galéja, modâvè in chki po rinkontrâ chon martyan. Chi-inke irè pâ tan bin yu di parin,…