D’uche a trè dzoua no l’i chin! Tolèchin, to rèthrin! Tochin tô Pâtyè! Ke dyon lè rèvi. Le premi dè novanbre, din le viyo tin, prà dè tsoujè tsandjivan. Lè j’omo betâvan pâ-mé le bredzon, irè le frotson è le triko. L’evê ch’anonhyivè, irè le momin dè to rinvoudre è dè chè betâ a dzo.

«Fére lè fouchè». Pâ rin, ti hou voyâdzo du la méjon ou chimetyéro. Lè chrysanthème… l’é rin trovâ chu le dikchenéro po chi mo; ma mére-gran dejê lè «renonkulè», chinbyè ke l’è pâ totafé chin. Che l’i a kôkon ke pou mè dre che l’i a on ôtro non… chôpyé.

Ma vo chédè bin, l’è, hou grô botyè ke no pyantâvan dè furi, pê le kurti. Outre le tsôtin, fayi lè bin chonyi, lè byochi, lè moyi, bètchi, déjêrbâ. Pu, fin chaptanbre no lè betâvan in po. Irè tyachon dè lè fére a krèthre è hyori. Dè dzoua iran fro ou chèlà.…