Vo j’i prou chure yê, kemin mè, din lè papê dè chta chenanna, chin ke l’an kontâ a propou dou mârtire di j’infan, betâ dè fouârthe din di j’orfelina tinyê pê di boryô.

Grantin, tru grantin apri, l’an keminhyi a dèvejâ. L’avan portan èprovâ dè dre ou dirèkteu. Ma, irè pâ fachilo dè dèvejâ, lè pouro piti trovâvan pâ lè mo. Alâdè trovâ di mo por èchplikâ l’inpochubyo. Èchplikâ di tsoujè kon konyè pâ. Hou ke l’an j’ou le korâdzo dè chè pyindre dèvan hou nêrè chotannè, l’an rèchu tyè na rèponcha: «Dzanyà!» On cheul mo!

Chukutâ, mèpriji, pâ inchtrui, tsanpâ deché, delé. To chin ou non dou Bon Diu! Ou non dè la Chinte rèlidzion? L’i a di mo ke chon tru pèjan. Di mo ke l’an avutrâ on mache dè j’inochin.

Adon ke l’i arè tan dè tsoujè a tsandji, tan dè grô kou dè remache a bayi; è bin na, i parè…