Deché-delé

N’in d’a dè totè chouârtè, di patê! Moujâdè on bokon, i tsandzon tan k’on và. D’on velâdzo a on’ôtro, mimamin de na famiye a l’ôtra. Tyin l’è le bon? Tyin l’è le djuchto? È bin, i vo deri ke l’an ti la mima vayà; fô rintyè chavê è volê le dèvejâ.

La chenanna pachâye, vo j’é dèvejâ dou kunyu. Kôkon m’a de ke chuvin yô l’i dejan «di j’èhyandzè». On Broyâ m’a de ke din la Brouye l’i dejan «Don Tsetsô». Portyè pâ!

Din le viyo tin, lè dzin rèmouâvan min tyè ou dzoua d’ora. Tsatyè velâdzo l’avê che n’ akthan, chon patê, chè kothemè è chè grôchè tithè. Irè pye fachilo. Tsatyè velâdzo irè chur d’avê le vertâbyo pâtê. Lè j’ôtro, iran to chinpyamin fô! L’è achebin chin ke l’a dèkoradji lè dzouno a l’aprindre.

Toparê! Di grôchè tithè, mè moujo bin ke n’in d’a adi kotyè j’enè! Alâdè mè…