Deché-delé

Bin ouê i dyo, no j’ôtro lè viyo. Vo j’ôtro, lè dzouno, vo fô yêre chin. Le patê l’è farmo konplikâ. Kan vo ditè viyo in patê, i vou pâ dre konpiètamin dèmèrlotâ, dèkunyatâ, tranpo, kancho è gaga.

L’anhyan l’è le pye viyo de la famiye. Le mo anhyan l’è on mo noubyo, nopâ. Lè j’anhyan chon achebin in franché: les ancêtres.

Che vo dèvejâdè d’on dzouno ke l’è pâ maryâ, vo ditè on viye-dzouno, na viye fiye. L’i a rin dè mèpri inke. Le viyo chindik, le viyo Prèfè; l’è pâ l’anhyan chindik ou bin l’anhyan prèfè. On kou ke l’an dèmichenâ, i vou pâ a dre ke chon di j’anhyan. On’in konyè, di viyo prèfè ke chon adi pyin dè nyêrga. Tyédè! N’in d’a prà.

To chin po n’in rèvinyi a no j’ôtro. Le furi l’è inke l’è le momin dè no dègremiyi. Lè mônè dou kurti no j’atindin, l’i a on bokon pêrto…