Dèvejâ dou bredzon chin moujâ ou dzakiyon, i richkè bin dè fére drèhyi lè pê chu la titha di «fèminichte».

Lè moudè chon bal-è-bin kemin lè damè: i tsandzon chovin! Din le viyo tin le dzakiyon irè rintyè la roba. Ouna chinpya roba dè mi-fi ou bin in koton. L’avan rin dè mandzè. Le hô irè bin charâ, ma le bâ irè anpyo è i dèchindê gayâ tantyè i geriyè. Chè kotâvè par dèvan è i krijivè prèvon, pêrmo ke kan la dama i atindê on poupon, fayi kan mimo povê kotâ chon dzakiyon. È lè gârda-roba iran pâ tsouhyi dè j’âyon. Lè pye rètse, n’in d’avan yon po la demindze, in chêya, ma irè bin râ.

Lè mandzè ke no j’an ou dzoua d’ora chon pye galéjè tyè hà dè chi tin. Irè rintyè lè mandzè de la tsemije. Di grôchè tsemijè in koton, di kou in tsenèvo. I rabrachivan on bokon lè grantè mandzè… ma pâ tru, la…