Deché-delé

Anfin la fenithra ouvêrta chu lè j’èthêlè no puin dremi kemin di rê, lè pi fro dou lèvè. La brijon di hyotsètè din lè prâ é l’è j’àrè ke chànon a la danye dou mohyi, l’i a rin dè mèyà po no brechi.

To chin po vo dre ke le tsôtin l’è rèpri. Kan la dzornâ ch’è pachâye a trakouâ chéve è léva, a gratouyi pê le kurti, a vadrouyi din lè dzà ou lè montanyè, ou momin d’alâ ou yi, l’i a rin-mé ke vo j’inpatsè dè ronhyâ kemin on bènirà. Din nouthron velâdzo, on pou dremi chu lè duvè j’oroyè, mimamin chè krouvâ avuê.

Chin ke l’è damâdzo, l’è ke a la peka dou dzoua, on intin pâ-mé le tsan dou pu, pêrmo ke kotyè dètêna le chupouârton pâ-mé. In vela, l’an la chèta è le chon di moteu, l’è prà pye chan.

ANNE MARIE YERLY

Ecoutez cet article en patois et en français sur www.lagruyere.ch