Deché-delé

Intrè duvè j’avêchè, chti an, in rin dè tin, lè payijan l’an fê lè fin. Fô dre ke po lè fin, kemin po to le richto din la ya, to va dè rido. Din le tin no j’alâvan a l’èkoula tantyè ou tyindzè dè juin è li-yè a chi momin ke lè prâ chè chèyivan è to le richto chè faji a la man. To dzouno, i alâvo bayi on kou dè man a mon vejin Milon po fére lè fin. No ramachâvan avu le tsavô apyèyi ou tsê a ètchilè. No fajan pâ tan dè yâdzo d’ouna vèprâ. Ma le pye pènâbyo irè kan fayi dètsêrdji din la grandze. Fayi lèvâ le fin in premi chu la loyèta è in apri chu la tètse, yô fayi kunyi dèjo lè tyolè è lè j’aranyè. Pâ fôta dè dre ke kan no dèchindan d’la tètse no j’iran brè dè tsô.

Kan i vêyo hou pechyintè machinè ke lè payijan l’an ora po fére lou travô, i moujo ou premi trakteu ke li-yé yu…