L’abé è lè j’armayi

En patois
En français

D’apri Roro, ke l’è jou tinyâre dè montanye, l’abé Perritaz l’è kemin le Bon Dyu, i konyè lè j’armayi. I m’a kontâ ke kan irè inkourâ a Châlè, l’abé l’è jou invitâ a l’athinbyâye di j’armayi d’la Grevire. Le préjidan, André Pittet dè Nonan, l’i a bayi la parola, chur d’oure ôtyè d’afriyindà. L’abé lou j’a de ke l’avi fê di touâ dè montanye, kan Denis Terreaux vinyê le tsertchi. On kou, chè trovâ din on tsalè in Vevéje. Chu dèmanda, l’inkourâ l’a bèni le tsalè, bèni le tropi, bèni la tsoudêre, bèni l’armayi. L’èfè l’è pâ jou tarubyo, l’an d’apri le tsalè l’avi bourlâ è l’armayi l’avi dèchidâ dè muri.

Avu Denis Terreaux, l’abé Perritaz chè rapalè kon kou l’è jou invitâ a goutâ vê l’inkourâ Menétrey dou Krè. Chtiche irè dèvorâ dè rematiche pê lè rin è chavi pâ mé a tchin chin chè vouâ. Denis li-ya rèkemandâ ouna pi dè tsa ke l’avi din le kofre dè ch’n’oto, è l’a tèlamin gabâ cha pi kontre le rematiche ke l’abé l’a èprovâye. Kotyè tin apri, l’inkourâ dou Krè irè choladji, ma on chà pâ che l’è la pi dè tsa a Denis ou bin Marguerite Bays ke l’i an mé fê dè bin.

A l’abé Perritaz ke l’è pâ mé pyin dè chindâ, no li kouâjin dè vouèrdâ onko grantin cha vèrdya d’èchpri.

Vonvon Kolly

 

L’abbé et les armaillis

Selon Roro, qui a été teneur de montagne, l’abbé Perritaz est comme le Bon Dieu, il connaît les armaillis. Il m’a raconté que quand il était curé à Sâles, l’abbé a été invité à l’assemblée des armaillis de la Gruyère. Le président, André Pittet de Nonan, lui a donné la parole, sûr d’entendre quelque chose de séduisant. L’abbé leur a dit qu’il avait fait des tours de montagne, quand Denis Terreaux venait le chercher. Une fois, il s’est trouvé dans un chalet, en Veveyse. Sur demande, le curé a béni le chalet, béni le troupeau, béni la chaudière, béni l’armailli. L’effet n’a pas été terrible, l’année suivante le chalet avait brûlé et l’armailli avait décidé de mourir.

Avec Denis Terreaux, l’abbé Perritaz se rappelle qu’une fois il était invité à dîner chez l’abbé Menétrey du Crêt. Celui-ci était dévoré de rhumatisme dans le dos et ne savait plus à quel saint se vouer. Denis lui a recommandé une peau de chat qu’il avait dans le coffre de son auto il a tellement venté sa peau contre les rhumatismes que l’abbé l’a essayée. Quelque temps plus tard, le curé du Crêt était soulagé, mais on ne sait pas si c’est la peau de Denis ou Marguerite Bays qui lui ont fait le plus de bien.

A l’abbé Perritaz qui n’a plus beaucoup de santé, nous lui souhaitons de garder encore longtemps sa verdeur d’esprit.

Vonvon Kolly

Catégorie: 

Annonces Emploi

Annonces Événements

Annonces Immobilier

Annonces diverses