I dyon ke l’è la mouda dè tsanpâ lè damè ou dèchu dou panê! N’in d’an tan batayi chu lè gajètè, chtou tin pachâ, tyédè. Adon vouè, l’è bin a vo, ke vé m’adrèhyi. Chin batayi è chin kontrèyi.

Pori pâ vo dre vouéro dè yâdzo di fèmalè m’an de, in franché: «I konprinnyo bin le patê, ma i oujo pâ le dèvejâ!» Toparê! I pu pâ krêre ke l’an dinche pouêre dè dèvejâ in patê. L’è portan pâ pye difichilo tyè le krouyo franglé ke no dèvejin ou dzoua d’ora. È no j’ôtrè, lè femalè no j’an portan on pechin «beta-fro». L’è pâ lè j’omo ke van dre le kontréro, por on kou.

I fô kan mimo rèkonyèthre ke, tru chovin, l’i a di dzin ke rijon dè hou ke fan di fôtè. Ma… l’è pâ di fôtè, l’è dou pâ-chavê. In pyathe dè rire è dè dre «tyéche tè, te châ pâ le patê!», portyè pâ, to bounamin lou j’èchplikâ. Fô rintyè trovâ lè mo, è lou dre: «in patê chè di dinche». I betè to le mondo a l’éje, è avu chin l’i a ouna fèmala dè-pye ke dèvejèrè in patê.

Anne Marie Yerly

A vous, Mesdames

L’on dit que c’est la mode de pousser les dames au-dessus du panier! On en a tellement bataillé dans la presse, ces temps passés, n’est-ce-pas? Alors aujourd’hui, c’est bien à vous que je vais m’adresser. Sans batailler ni contrarier.

Je ne pourrais pas vous dire combien de fois des dames m’ont dit, en français: «Je comprends bien le patois, mais je n’ose pas le parler!» Voyons! Je ne peux pas croire qu’elles aient si peur de parler patois. Ce n’est pourtant pas plus difficile que le mauvais franglais que nous parlons aujourd’hui. Et nous autre les femmes, nous avons pourtant un fameux bagout. Ce ne sont pas les hommes qui vont dire le contraire, pour une fois.

Il faut tout de même reconnaitre que, trop souvent, il y a des gens qui rient de celles qui font des fautes. Mais… ce ne sont pas des fautes, c’est du «pas savoir». Au lieu de rire, et de dire: «Tais-toi tu ne sais pas le patois!», pourquoi pas, tout bonnement leur expliquer. Il faut juste trouver les mots, leur dire: «En patois l’on dit comme ça». Ça met tout le monde à l’aise, et avec ça, il y aura une femme de plus qui parlera patois.

Anne Marie Yerly