Tsalandè, la fitha tan d’amâye, la fitha de la Pé è di famiyè. Dèvan ha fitha, vouéro dè galéjè rinkontrè i fenithrè di méjon, dè konthê dè mujika è dè tsan. Ma, achebin vouéro dè krintsemalichè, dè lumiérè, dè dèkouâ dè krouyo go, è dè hou krouyo «Père Noël» pindu amon lè ramirè di méjon!

Anfin, tsakon l’a le drê dè léchi alâ chon pyiéji yô y pà. L’è kan mimo ou fon di kà ke Tsalandè chè va fithâ. Di balè vèyè in famiye, chin kontrèyondzè è din le dzouyo. Anhyan, grôchè dzin è piti j’infan ke partadzon ouna bouna marinda, chin l’è le pye bi kadô dè Tsalandè.

On piti moujiron kan mimo po lè chaptantè-thin million dè dzin ke chon tséhyi fro dè lou payi è ke pyàron chu lè tsemin dè ninya-pâ.

A vo totè è ti, ami patêjan, ami ke yêjon ha biyiôta chu nouthra bouna gajèta la Grevire, i vo kouâjo on Tsalandè pyin dè bouneu.

Anne Marie Yerly

Avant Noël

Noël, la fête bien aimée, la fête de la Paix et des familles. Avant Noël, combien de jolies rencontres aux fenêtres des maisons, de concerts de musique et de chants. Mais aussi, combien de futilités, de lumières, de décors de mauvais goût et de ces vilains Pères Noël pendus aux façades des maisons!

Enfin, chacun a le droit de laisser aller son plaisir où il peut. C’est quand même au fond des cœurs que Noël va se fêter. De belles veillées en famille, sans chicanes et dans la joie. Vieux, grandes personnes et petits enfants qui partagent un bon souper, ceci est le plus beau cadeau de Noël.

Une petite pensée tout de même pour les 75 millions de gens qui sont chassés de leur pays et qui pleurent sur les chemins de nulle-part.

A vous tous et toutes, amis patoisants, amis lecteurs de ce billet sur notre bonne gazette, La Gruyère, je vous souhaite un Noël plein de bonheur.

Anne Marie Yerly