Deché-delé

Le patê l’è kan mimo pâ fachilo. Tyédè, vo ke vo j’ithè in trin dè yêre chi papê! Le premi dè l’an, y dyon: Bondzoua dè boun’An. Alâdè traduire chin in franché. L’è pâ bin bi, ma l’è dinche pêrdji!

L’i a adi pâ tan dè j’an, lè fiyu alâvan adi tsêrtchi le Boun’An, lè j’èthrênè. On dumizoua, intrè lè fithè, le parin ou bin la marêna, inkotyivan on piti ôtyè a medji è a bêre. La dona è chon piti vinyan «tsêrtchi le Boun’An». Irè na tradihyon. Medjivan è bêvechan inthinbyo, pu apri y bayivan ouna ptita trêthe, din la tyinta l’avan dzubyâ na pithe dè thin fran.

La trèthe chè dejê achebin dou Boun’An. Ma bouna tanta Louise, ke dèvejâvé pye chovin patê tyè franché, mè di on dzoua: «Tu veux un morceau de bon an?» L’è pâ konprê le premi kou, ma ha trèthe, ke fajê mima, m’in chovinyo…