Deché-delé

Li-ya on rèvi ke no j’an jou oyu: Kan on betè dji pètsenê è dji tsahyà dè binda, chin fâ vin dzanyà. È portan, lè pâ di dzanyè dè dre ke lè pèchenê de la Brouye chon mô menâ. L’Ètha lou j’a bâti a gran fré ouna pèchenêre a Thavayi-le-Lé è chtache l’a djamé fonkchyenâ. Ora l’Ètha chè virè d’la pâ dou tyinton dè Noutsathi po trovâ chè tsacho. Vêr no, li-ya dè chin kotyè j’an, lè pèchenê dou lé d’la Grevire l’an achebin jou di nyô avu l’Ètha. Mè krêyo k’ora lè j’afére van mi.

Lè tsahyà l’an achebin lou rèbritsè. Dariremin, no j’an aprê ke dou dèputé l’an dèmandâ dè barâ la tsathe y j’alintoua dè Bounavaux. Lè j’èmi dè chin Hubê ne l’intindon pâ d’la mim’oroye è van chè dèfindre. Vo vêdè k’ithre tsahyà ou pèchenê l’è gayâ parê. Ti dou dêvon chovin chèkâre le mimo panê. VONVON…