La tyinta bala vèya no j’an pachâ a Chorin. Ouna pràva dè pye ke le patê l’è adi pâ mouâ. La chochyètâ di Dzouno, l’a rèkordâ, travayi, ètudèyi to l’evê, po betâ chu pi trè pithè dè téâtro. Duvè galéjè fâchè in franché, farmo bin fichalâyè. Di dzouno ke rèchpèkton lè chpèktateu in lou prèjintin on dju parfè.
La pithe in patê l’è na ravuchête, kan on moujè ke hou dzouno dêvon dza aprindre a la yêre, a chavê chin ke vou a dre è a chè bin prèjintâ. On grô è bi travô. La pithe «Chènia inchtâlè la radiô» chè pâchè din lè j’an karanta-thinkanta. L’an bin rèchpèktâ lè j’âyon è lè kothemè dè chi tin.
Damâdzo ke din la châla, on mâlèdrê, chè betâ a kritikâ lè j’akteu, in lou dejin chin vèrgonye k’irè pâ djuchto, ke prononhyivan pâ kemin fô. Adon, n’in d’a yon, ke l’a jou le korâdzo dè li rèbrekâ: «Che te vou rèmolâ, tè fô ou mintè le fére in patê!»
È bin l’è chovin hou ke châvon pâ le patê, ke kritikon le mé. Adon, galé dzouno dè Chorin, oubyâdè lè tâko, è chobrâdè dzoyà.
Anne Marie Yerly
Bel encouragement
Quelle belle soirée avons-nous passé à Sorens. Une preuve de plus que le patois n’est pas encore mort. La Jeunesse a cherché, travaillé, étudié tout l’hiver, pour mettre sur pied trois pièces de théâtre. Deux jolies farces en français, fort bien ficelées. Des jeunes qui respectent les spectateurs en leur présentant un jeu parfait.
La pièce en patois est une réussite, quand on pense que ces jeunes doivent apprendre à la lire, à savoir la traduire et à se bien présenter. Un grand et beau travail. La pièce «Papa installe la radio» se passe dans les années quarante-cinquante. Ils ont bien respecté les vêtements de l’époque et les coutumes de ce temps-là.
Dommage que dans la salle, un maladroit s’est mis à critiquer les acteurs en leur disant, sans vergogne, que ce n’était pas juste, qu’ils ne prononçaient par comme il faut. Alors, quelqu’un eut le courage de lui répliquer: «Si tu veux râler, il faut le faire au moins en patois!»
Et bien, c’est souvent ceux qui ne savent pas le patois qui critiquent le plus. Alors gentille jeunesse de Sorens, oubliez les imbéciles et rester joyeux.
Anne Marie Yerly