Deché-delé

Kan i vêyo la gredalâye dè méjon ke krèchon parto, i rèmoujo i viyè è balé méjon kemin n’in chàbrè adi kotyè j’enè, pê bouneu. Mè rèvin l’ichtouâre ke m’an kontâ mè j’anhyan. Din nouthron velâdzo, l’i a dè chin than thinkant’an ou mintè, l’i avê mé dè pourè dzin tyè dè retso. Totè lè famiyè travayivan intrè là, tsakon bayivè chon pochubyo.

Chu le piti bin di Lètchirè, l’avan dèchidâ dè bâti. La famiye irè dza grôcha, trè bouébo è duvè balè fiyè. Le chènia è lè bouébo l’an fê réchi le bou po la lèvire. L’an intaya. On di bouébo ke fajê on bokon le bôtche, l’a montâ lè mu. On bi matin la lèvire irè drèhya, chobrâvè rintyè a hyoulâ lè laton pu li betâ lè tiolè. L’aran bin amâ di taviyon, ma irè tru tyiê! La pitita fortena l’avi fondu kemin nê ou chàla. Grô pochyin! L’avan rin-mé…