In hou tin dè kouêrla, mè rèvin l’ichtouâre ke Dzojè a Jules m’a kontâ, l’i a dè chin diora trint’an. Chi l’omo irè chobrâ viy’dzouno, on originô, ma bin d’amâ.

In mile nou-thin dji-j’è vouète la gripe yètâvè lè pye dzouno. Din nouthron velâdzo, le pye viyo ke l’è mouâ l’avê karant’è dou j’an. 

Dzojè, ou chêrvucho militêre, malâdo, irè ochpitalijâ a Bêrna; din oun’èchpéche dè lazarè yô iran l’è j’on par dèchu lè j’ôtro. Lè mêdzo è lè j’infirmyérè iran dèpachâ. L’è po chin ke chovin, lè famiyè alâvan mimè, chonyi lou malâdo. 

La bouna dona a Dzojè, l’a prê di tijannè, ouna vèyeuje è dou pètrole, l’è jelâye a pi tantyè a Friboua pu l’a prê le trin tantyè a Bêrna. L’è chobrâye ouna chenanna pri dè chon bouébo. L’ingojalâvè a boré dè chè tijannè, ke betâvè a kouêre chu cha vèyeuje. L’a vouêri! Kan mè kontâvè chin, le brâvo Dzojè l’avê lè lègremè y j’yè.

L’i a thant’an, vo vêdè, lè viyo chonyivan lè dzouno. Vouè l’è no, lè viyo ke no chin menachi… è bin tan pi! 

Anne Marie Yerly

La grippe de dix-huit

En ces temps d’épidémie, me revient l’histoire que Joseph à Jules m’a racontée il y a de ça bientôt trente ans. Cet homme était resté vieux garçon, un original, mais bien aimable.

En mille neuf cent dix-huit la grippe fauchait les plus jeunes. Dans notre village, le plus âgé, mort de la grippe, avait 42 ans.

Joseph, au service militaire, malade, était hospitalisé à Berne, dans une espèce de lazaret, où ils étaient les uns sur les autres. Les médecins et les infirmières étaient dépassés. Voila pourquoi souvent, les familles venaient elles-mêmes soigner leurs malades.

La bonne maman de Joseph, a pris des tisanes, un réchaud et du pétrole, est allée à pieds jusqu’à Fribourg et pris le train jusqu’à Berne. Elle est restée une semaine auprès de son fils. Elle lui faisait avaler des quantités de ses tisanes, qu’elle préparait sur son réchaud. Elle l’a guéri!

Lorsqu’il me racontait ça, le brave Joseph avait les larmes aux yeux.

Il y a cent ans, voyez-vous, les anciens soignaient les jeunes. Aujourd’hui, c’est nous les vieux qui sommes menacés… et bien tant pis!

Anne Marie Yerly