Bouébelè, i èprovâvo d’akrotchi la râye dè Chin Martin. Bouébo, alâvo brakounâ lè trêtè din le ryô ke kolâvè darê d’intche no. Dè dre di trêtè l’è di dzanyè, pye chovin rintrâvo bredouye ou bin, avu rintyè on tsacho po règalâ le tsa. Ma, le pye galé dè mè chovinyi, l’è chi dou tsôtin dè mè djij’è-chat’an. Avu dutrè pê in dèpye dèjo le minton, i brakounâvo adi, ma pâ la trêta. L’irè ouna grahyàja brechàla ke l’avê di j’yè a fére a danâ on’èvètyè. Rintyè d’oure chon piti non, on chonnabon dè roujè mè gatoyivè lè nari.
Di kou, a la bèdiche dou dèvêlené, l’inbarkâvo chu mon pèklô è, to bounamin no j’alâvan kortijâ chu on piti ban a ruva dè la dzà. On dè hou piti ban ke vo bayè l’invide d’agothâ ou pètchi. Vo vêdè! Intsèrèyi pê la brijon d’on cherin, on bokenè kotyin, chè fôfelin intrè lè foyè, on chè kontâvè dutrè dzanlyètè. Tindramin, ma man anyatâvè chè pê dorâ è pu, kemin pêr ajâ, dzubyâvè chu chè dzènâ. La tindrèthe dè chè béjon tsô è matso, m’invouyivè tantyè i j’andzè. Vo j’i dèvenâ? On fajê pâ tyè chè vuityi din lè j’yè. Ma… la ya irè bala, le loutsèrou ululâvè è l’avinyi no trakachivè pâ. On bokenè chu le tâ, no rintrâvan drelin-drelin, bré dèchu bré dèjo. L’è dèvan cha pouârta, in li bayin on dari béjon ke l’é moujâ: – Kredyé, l’é oubyâ dè rapèrtchi mon pèklô!
Bèrnâ Chaney
Farces d’été
Jeune garçon, je tentais d'attraper l’arc en ciel. Plus grand, j’allais braconner les truites dans le ruisseau qui coulait derrière chez nous. Dire des truites, c’est des mensonges, plus souvent je rentrais bredouille, ou simplement un alevin pour régaler le chat. Mais, le plus joli de mes souvenirs, c’est celui de l’été de mes dix-sept ans. Avec deux ou trois poils en plus au menton, je braconnais encore, mais pas la truite. C’était une gracieuse jeune fille qui avait des yeux à damner un évêque. Rien que d’entendre son petit nom, un parfum de rose me chatouillait les narines.
Parfois, à la tiédeur du soir, je l’embarquais sur mon vélo et, tout doucement, nous allions courtiser sur un petit banc à l’orée de la forêt. Un de ces petits bancs qui vous donne l’envie de goûter au péché. Vous voyez ! Ensorcelés par le murmure un peu coquin du soir, qui se faufilait entre les feuilles; on se racontait quelques petites blagues. Tendrement, ma main caressait ses cheveux dorés, et puis, comme par hasard, glissait sur ses genoux. La tendresse de ses bisous chauds et humides, m’envoyait aux anges. Vous avez deviné? On ne faisait pas que se regarder dans les yeux. Mais, la vie était belle, le hibou ululait et l’avenir ne nous tracassait pas. Un peu plus tard, nous rentrions , tout bonnement, bras dessus bras dessous. Là-bas, devant sa porte, lui donnant un dernier baiser, c’est là que j’ai pensé: «Crédié, j’ai oublié mon vélo!»
Bernard Chaney