Un dèjo de la vela dè Grevire, l’i a ouna tota galéja tsapalèta, yô lè fèmalè ke l’avan dou mô d’avê di j’infan, vinyan lou rèkemandâ a Nouthra Dona, La Tsapala di Bri, l’i dejan.
Din mon velâdzo, no j’an achebin kotyè j’indrê bènirà. Nouthron viyo mohyi dè Vê Chin Piéro, on trèjouâ, viyo dè mé dè mile an, yô no van ti lè j’an in pèlerinâdzo. Nouthra Dona dè Prâbou chu la Konbê. Chin Nikolé de Flüe din le bou d’Échê. Ma achebin, Nouthra Dona dè Pyan, ke l’a brechi me n’infanthe.
Ouna dè mè vejenè, ouna boun’anhyanna ke l’è mouârta l’i a bin di j’an, m’a kontâ on bokon cha ya. Irè maryâye du dza kotyè j’an, è vo chédè bin k’in chi tin, on chè maryâvè por avê di j’infan! Irè le premi kemandèmin ke Moncheu lou bayivè le dzoua dou maryâdzo: fédè vouthron dèvê!
Bon, l’an fê chin ke fayê. Ma…ou bè dè kotyè j’an, adi rin! Kan i pachâvan lè dou, dèvan Nouthra Dona, chè rèkemandâvan: «Chôpyé, bayidè-no di j’infan, bouna Dona!» Fô krêre ke l’an trovâ la bouna mouda; on bi dzoua on grô bouébo l’è arouvâ. Pu, on kou inbriyâ, chon arouvâ, l’on apri l’ôtro, kotyè galéjè fiyètè, è di bouébelè bin dèboubenâ.
To dzoua è-the, ke, y chon rèjelâ vê Nouthra Dona: «Bouna Dona, no vo rèmârhyin, ma ora, le konto l’è bon!» Anne Marie Yerly
Notre Dame des Berceaux
En dessous de la ville de Gruyères, il est une jolie petite chapelle, où les femmes qui n’avaient pas encore d’enfant venaient se recommander à Notre Dame, on l’appelle la chapelle des Berceaux.
Dans mon village, nous avons aussi quelques endroits bénis. Notre vieille église de Vers St.Pierre, millénaire, où nous allons chaque année en pèlerinage. Notre Dame de Prabou sur la Combert. Saint Nicolas de Flüe dans le bois d’Essert. Mais aussi, Notre Dame de Plan, qui a bercé mon enfance.
Une de mes voisines, une bonne grand-mère qui est morte il y a bien des années, m’a raconté un peu sa vie. Elle était mariée depuis quelques années et vous savez bien qu’en ce temps-là, l’on se mariait pour avoir des enfants ! C’était le premier commandement que le curé leur donnait le jour du mariage : faites votre devoir !
Bon, ils firent ce qu’il fallait. Mais au bout de quelques années, toujours rien ! Quand ils passaient devant Notre Dame, ils se recommandaient : » S’il vous plait, donnez-nous des enfants, bonne Mère. » Il faut croire qu’ils trouvèrent la bonne méthode ; un beau jour, un gros garçon leur est arrivé. Puis une fois bien entrainés, sont arrivés l’un après l’autre, quelques jolies fillettes et des garçons bien éveillés.
Toujours est-il qu’ils sont retournés vers Notre Dame: «Bonne Mère, nous vous remercions, mais maintenant, le compte est bon!» Anne Marie Yerly