L’avantura ke vo konto vouè, l’è pâ na dzanya, l’è arouvâye a on viyo koujin dè Balavouêrda, l’i a dza bin di j’an. Di galéjè dzin, cha fèna è li. L’avan rin j’à dè j’infan, i vèkechan pèjubyamin din lou méjenèta.

On bi dzoua, l’an dèchidâ dè fére on piti voyâdzo, ouna pitita chayête pâ tru tchira. Kotyè fran, n’in d’avan kan mimo, ma, pâ tyachon dè lè betâ a la banka. On galé patyotè dè biyè dè mile.

Ouê ma, yô lè betâ kan on ch’in va? L’a trovâ! L’è j’a inmandji amon le tuyô dou forni. Chè de ke dinche, nyon moujèrè d’alâ robâ chin amon-lé. L’a achebin dèmandâ a chon vejin d’alâ du tin j’in tin vouityi ke to alichè bin intye-li. L’i a bayi la hyâ.

To alâvè bin, tantyè a on bi matin, ke le ramouneu chè anonhyi. In inmandzin le nirechon amon le tuyô, l’è pâ de la chourtse ke l’a dègredalâ, ma bal-è-bin la fortena a Florian.

Bin onitho, le vejin l’a payi le ramouneu è lè mile l’an rètrovâ la katse chonbra.

Anne Marie Yerly

Une chance

L’aventure que je vous raconte aujourd’hui n’est pas une blague, elle est arrivée à un vieux cousin de Bellegarde, il y a déjà bien des années. De gentils gens, sa femme et lui. Ils n’avaient pas eu d’enfants, ils vivaient paisiblement dans leur maisonnette.

Un beau jour, ils décidèrent de faire un petit voyage, une petite sortie pas trop chère. Quelques francs, ils en avaient quand-même, mais, pas question de les mettre à la banque. Un joli petit paquet de billets de mille.

Oui, mais où les mettre quand on s’en va? Il a trouvé! Il les a enfilés dans le tuyau du fourneau. Il s’est dit que personne penserait d’aller voler ça là-haut. Il a aussi demandé à son voisin d’aller, de temps en temps, voir si tout allait bien chez lui. Il lui donna la clé.

Tout allait bien jusqu’à un beau matin, où le ramoneur s’est annoncé. En envoyant le hérisson dans le tuyau, ce n’est pas de la suie qui a dégringolé, mais bel-et-bien la fortune de Florian.

Bien honnête, le voisin a payé le ramoneur et les mille ont retrouvé la cache sombre.

Anne Marie Yerly