Deché-delé

Lè kurti, cht’i tsôtin chon pâ jou tan retso dè kurtiyâdo. Di matin dè dzalâ è di dzornâ dè tanfa. La grêla chuvin yô, pu mimamin di j’ivouâdzo. To chin l’a fê ke nouthrè pouro kurti bayon pâ tan d’afére. Lè chalârdè chon montâyè in granna, lè j’inyon chon adi to rèthrin, lè pre dè têra… oudron ti bin, po la «raclette». Di j’èpenatsè n’in fô pâ dèvejâ. Mè chinbyè portan ke l’é fê parê tyè lè j’ôtro j’an.

Lè faniyoulè adon, l’an bin bayi. Mè chinbyâvo ke l’avé to ramachâ, pu l’ôtri, lé rèmarkâ ke rèkeminhyivan a hyori. Du ma fenithra mè chinbyâvè vêre di galé piti botyè bian. Drôlo d’afére, anfin mè chu dete ke l’an dou mile vint’yon cherè on an patikuyé.

Fô djamé krêre i mèrâhyo! On kou to pri dou mochi dè fanfiyoulè botyiatâyè, l’è trovâ la fâcha: hou bi botyè iran dè hou…