Deché-delé

N’in d’a ke dyon la tsata-bouârna. Vo vo chovinyidè kan no l’i dzuyivan, l’i a dè chin bin di j’an. Irè le bon tin yô on chè dèmorâvè a bon konto.

La demindze né, din lè méjon yô lè fiyè fajan pâ tru «prinbè», lè dzouno, in vèlo ou bin a pi, arouvâvan po hou fameu kâfé-nê. Irè pâ rin! A l’othô chovin, po pâ dèthorbâ lè j’anhyian ke chumiyivan chu le forni dou pêyo. To le mond irè, a l’intoua de la trâbya. On bokon dè kâfé, dou trobyon chovin, dutrè brèchi, on vêrlè ou dou dè poma kan mimo. A pou dè frè no pachâvan di galéjè vèyè.

Po chè dèruyi lè pyôtè, no danhyivan on bokon. La mujika, oun’èchpéche dè «tourne-diske» viyelè, ke fajê du tin j’in tin di krouiyè tsifrenâyè, ma i chufijê!

Pu di kou, no fajan a la rata-bouârna, din tota la méjon, chin la mindra lumyére. Chin i…