Deché-delé

Du dyora dou j’an ke dourè chi pot’afére, ha têrubya kouêrla; l’è le momin dè pachâ a ôtyè d’ôtro. Anfin le tsan l’a rèprê. Irè dyora le momin. Por avutrâ to chin, no van tsantâ a pyêna vouê! Du l’Intyamon tantyè ou fon de la Brouye, lè rèpètichyon van bon trin. Piti è grô, l’an a kà d’inkotchi Tsalandè din le dzouyo è l’aligranthe.

Tot’in vouêrdin chapyinthe è prudinthe, le tsan rèdzoyè la vouê, lè pormon è chuto le kà. Kan te rèvin du la rèpètichyon, t’i to redyè, rènovalâ, t’i benéje è te douâ bin!

Adon, rèdzoyidè-vo, di galé konchê ch’inkotson, din lè mohyi, lè châlè dè gayâ ti lè velâdzo, in vela achebin. Mozart, Moret, Aeby, Bovet è prà dè j’ôtro, van vo j’intrètsantâ. N’ôché pâ pouêre, on konchyié fèdèral dejê: «Le rire lè bon po la chindâ»… ma adon, le tsan, l’è bin…