Deché-delé

L’ôtri, achètâye avu yon dè mè piti fe, no j’an keminhyi a dèvejâ dou viyo tin. Le dzouno voli chavê kemin no pachâvan nouthron tin, kan no j’iran dou mim’âdzo tyè li. L’è adon ke mè chu rindu konto ke prà dè j’afére iran pâ-mé parê. A propou dè la rèlidzyon chuto!

Mouja-vê on bokon, mon piti: ti lè matin, la mècha dèvan l’èkoula. On kou dedin, la premire lethon: le katchimo, ti lè dzoua. Le dumidzoua: la bible. No dêvechin aprindre to chin par-kà. Irè bon po la mèmouâre!

Te châ, in chi tin l’inkourâ l’avê on pechin travô. Ti lè dzoua la mècha, le katchimo din ti lè kour,on kou pê chenanna, la vijita di malâdo, di famiyè, portâ le Bon Diu i murechin, mariâ , batchi è achebin intêrâ ti chè parotsin. Chin kontâ, ti lè dechando ou konfichenéro. No lè j’infan, no l’i alâvan, è bin…