Chin fâ gayâ trè j’an ke lè chochyètâ dè dzounèche chon pâ rèpachâye din lè méjon po tsantâ le mi dè mé. Moujâdè on bokon, kan on chè rèdzoyè ti lè j’an dè ch’èpardzemalâ din le velâdzo por alâ anonhyi le furi è k’on pou pâ le fére dou j’an a chouêdre, chin irè pâ fachilo po lè dzouno…

Ma l’afére l’è pâ tsejête in èkouéche! Ora ke ha kouêrla chinbyè ch’adôdâ, tyin dzouyo por no dè rèkeminhyi nouthrè divêrchè j’andrenâyè. Dèvan dè no rètrovâ chti tsôtin in Tsarmê po lè rinkontrè di dzounèchè gruvèrênè, no van keminhyi pê vinyi tsantâ le mi dè mé.

Chti an, lè dzouno dè nouthra kotse l’aron a kà dè rèbetâ anfin le dzakiyon è le bredzon por alâ tsantâ di galé redzingon, di kou mimamin in patê! Bin chur ke n’in d’a ke tsanton mi tyè di j’ôtro, chin dèpin de la binda. Ma tyè pouârtè-the, kan on chè bayè de la pêna è ke kotyè kou lè j’anhyan l’an lè lègremè din lè j’yè, on pou tyè ithre kontin!

In dèpye di tsanthon ke l’an inkotyi, l’è dzouno âmon achebin menâ l’andyèta avui lè dzin dou velâdzo è portyè pâ bêre kartèta. No j’an achurâ ti fôta dè no rètrovâ avui di bi fôri po pachâ di bounè vouêrbè è rètsoudâ nouthrè kà avui nouthrè galéjè tradihyon. Hou balè kothemè ke nouthrè dzouno léchon pâ kore!

Kemin di le rèvi de la fèdèrachyon di dzounèchè gruvèrênè: «L’avinyi de la Grevire l’è din lè man de la dzounèche!»

Romain Pittet

Les jeunesses sont de retour

Cela fait presque trois ans que les sociétés de jeunesse ne sont pas repassées dans les maisons pour chanter le mois de mai. Pensez-voir, quand on se réjouit chaque années de s’éparpiller dans le village pour aller annoncer le printemps et qu’on ne peut pas le faire deux ans de suite, ceci n’était pas facile pour les jeunes…

Mais rien n’est tombé à l’eau! Maintenant que ce virus semble s’apaiser, quelle joie pour nous de pouvoir recommencer nos diverses activités. Avant de nous retrouver cet été à Charmey pour les Rencontres de jeunesses gruériennes, nous allons commencer par venir chanter le 1er mai.

Cette année, les jeunes de notre région auront à cœur de remettre enfin le dzakiyon et le bredzon pour aller chanter des jolis refrains, parfois même en patois! Bien sûr qu’il y en a qui chantent mieux que d’autres, cela dépend de l’équipe. Mais cela ne fait rien, quand on se donne de la peine et que quelques fois nos aînés ont les larmes dans les yeux, on peut en être que satisfait!

En plus des chansons qu’ils ont préparées, les jeunes aiment aussi échanger et discuter avec les villageois et pourquoi pas boire un verre avec eux. Nous avons certainement tous besoin de nous retrouver avec de beaux sourires pour passer de bons moments et se réchauffer nos cœurs avec nos chères traditions. Ces belles coutumes que nos jeunes ne laissent pas tomber!

Comme dit le slogan de la Fédération des jeunesses gruériennes: «L’avenir de la Gruyère est dans les mains de la jeunesse!»

Romain Pittet