Deché-delé 

Tchin piéji dechando pachâ d’oure chu le «site» de La Grevire è in d’apri dè yêre din «Deché-delé» le galé papê dè Romain Pittet ke chè rèdzoyè dè poui rè alâ tsantâ le mi dè mé avu lè dzouno dè chon velâdzo. To le mondo atin avu piéji chi momin dè rè oure lè tsan di j’infan, pu di dzouno, le dèvêlné, ke no j’anonthon le furi avu ha galéja kothema dou premi dè mé, intarâye dou j’an dè tin, on châ por tyè.

Avu Romain Pittet, no j’an trovâ on dzouno ke l’a a kâ dè dèvejâ in patê. A la darire athinbyâlye di patèjan d’la Grevire a Vuadin, Romain no j’a intrètinyê de l’èchpèrianthe ke l’a fê din le kâdre dè chon mihyi a vinyi dè réjan, in rinkontrin di j’infan a Tsarmê, po lou fére a konyèthre l’aproutse dou patê, avu di mo chinyifyi chu di dju dè kârtè. Chin l’è ouna bouna novala…