Deché-delé

Nouthron piti payi l’è bin konplikâ, katre linvouè ch’inkemahyon l’ena din l’ôtra, kemin lè pâ pèrmè. Vo vêdè kemin l’an dou mô dè ch’intindre parmi lè j’otoritâ. Le Palè Fèdèral l’è pyin dè tradukteu po ke to alichè mi. L’è poutithre po chin ke va tan grantin po prindre na dèchijyon.

Tyè ke n’in chàbrè dè hou linvouè? La linvoua di Grijon, le romanche, l’è gayâ kemin nouthron patê, l’a dou mô dè chuêdre. Lè Chuiche-Aleman, l’an vouêrdâ ti lou patê, rèchpè! Ma l’an achebin dou mô avui le boun’Aleman. Ou Tessin achebin, n’in d’a prà ke dèvejon in aleman, l’an on bokon oubyâ le Tichinese.

No j’ôtro, lè Reman, i parè ke no dèvejin le franché. Ma tyin franché, chôpyé? I dyon ke le patê ch’in-va, ma le franché prin le mimo tsemin. On intin djamé tot’ouna frâje chin ke l’i ôchè…