Po lè than t’an d’la chochyètâ di j’armayi d’la Grevire, le Mujé gruvèrin l’a publèyi ôtyè dè farmo galé. On pou i yêre k’in djijè-vouèthan thinkantè-chê – chin fâ dza on tro dè j’an – lè j’armayi d’la Grevire iran montâ a Paris avu on tropi dè vatsè por ouna fitha in rapouâ avu la payijanèri. Mè moujo k’lè bithè chon jou invagounâyè. I vêyo pâ outramin.

Mé d’on chyêkle apri, h’aventura l’è rèchayête din la titha dè kotyè grô bounè dou grevire è dou vatsèrin fribordzê. Fô dre ke li-ya dza bin grantin k’lè dou mèyou anbaksyour dou tyinton fan ti lè j’an le bouneu di fênè botsè a l’ekpojichyon dè Paris. Hou rèchponchâbyo l’avan fan dè rèfére ouna poya a Paris a chi l’okajyon. Ma l’è pâ jou dinche, lè j’otoritâ dè ha granta vela avu le trafi k’on li konyiè, n’an pâ bayi l’èpâhyo i j’armayi d’la Grevire dè dèchindre lè «Champs Elysées» è i Parijyin d’oure le bi redzingon d’on tropi. L’è bin damâdzo, ma on pou konprindre.

Le kortéje po lè than t’an d’la chochyètâ di j’armayi no j’a rèdzoyi è no j’an yu pachâ dou bi tropi: chi d’la Part-Dyu po lè rodzè è chi dè Kutyèrin po lè nêrè.

Kan iro bouébo, chovin le tropi dè nêrè irè chi d’la fêrma dè Machin. Chi tropi irè la rèfèranthe d’la rathe tyaka- nêre fribordzêre. A konparâ avu ora, lè vatsè iran bin in tsê, avu di balè kouârnè, ma lè j’uvro  n’iran pa ache gonhyo.

Vonvon Kolly

De la Gruyère à Paris

Pour les cent ans de la Société des Armaillis de la Gruyère, le Musée Gruérien a publié quelque chose de très joli. On peut y lire qu’en 1856 – cela fait déjà beaucoup d’années – les armaillis de la Gruyère étaient montés à Paris avec un troupeau de vaches pour une fête en rapport avec la paysannerie. Je pense que les bêtes ont été enwagonnées. Je ne vois pas autrement.

Plus d’un siècle après, cette aventure est ressortie dans la tête de quelques dirigeants du gruyère et du vacherin fribourgeois. Il faut dire qu’il y a déjà bien longtemps que les meilleurs ambassadeurs du canton font, toutes les années le bonheur des fines bouches à l’Exposition de Paris. Ces responsables avaient envie de refaire une poya à Paris à cette occasion. Mais ce n’a pas été comme ça, les autorités de cette grande ville, avec le trafic que l’on connait, n’ont pas donné la possibilité aux armaillis de la Gruyère de descendre les Champs-Elysées et aux Parisiens d’entendre le beau refrain d’un troupeau. C’est bien dommage mais on peut comprendre.

Le cortège pour les cent ans de la Société des armaillis de la Gruyère nous a réjoui et nous avons vu passer deux beaux troupeaux : celui de la Part-Dieu pour les rouges et celui de Cuquerens pour les noires.

Quand j’étais garçon, souvent le troupeau de noires était celui de la ferme de Marsens. Ce troupeau était la référence de la race blanche et noire fribourgeoise. A comparer avec maintenant, les vaches étaient bien en chair, avec de belles cornes, mais les mamelles n’étaient pas aussi gonflées.

Vonvon Kolly