La Chin Dzâtyè l’è pachâye, ma lè chovinyi pâchon pâ dinche! Din nouthron dzouno tin, no j’ôtrè lè fiyè, no j’avan pâ tan chovin dè tyè no dèmorâ. Intrè lè fin è lè rèkouâ no j’alâvan, in famiye fére on piti toua vê Nouthra Dona di Martsè! 

Kemin «liji», no j’ôtrè lè fiyè, è bin… no dêvechin dèjêrbâ le chimetyéro. On kou ou dou pê tsôtin. Di grô panê, di chahyorè è dè l’élo dè kàdo. Pu no gratâvan intrèmi di fouchè, no portâvan fro lè panê dè mônè tantyè ou ruklon. No prenyin chin de la bouna pâ, in batoyin è in rijin. Moncheu no j’a portâ, on kou, on piti ôtyè a bêre… tyin kovin!

Ma adon la Chin Dzâtyè, l’i rèvinyo. No l’i chin kan mimo chovin jelâ. Dzouno è fiyè chti kou, in vèlo, tantyè a Balavouêrda. No modâvan du la Mècha bin chure, Bataye irè pâ tota goudrenâye, lè kontoua iran pavâ. Ma bon, irè la fitha! A La Tsintre no no j’arèthâvan ouna vouêrbèta, pu Balavouêrda, a La Wasserfal. Pou d’ardzin a la fata, no bêvechan pou d’afére, medjivan chu le pàdzo, ma adon, po danhyi, no j’iran inke, tantyè a la mi-né.

Pâ tan frè po rintrâ, le lindèman irè pènâbyo, ma lè chovinyi li chon adi… vo dio pâ to!

Anne Marie Yerly

La Saint Jacques

La Saint Jacques est passée, mais les souvenirs ne passent pas comme ça! Dans notre jeunesse, nous autres filles, nous n’avions pas souvent de quoi nous amuser. Entre les foins et les regains nous allions, en famille faire un petit tour à Notre-Dame des Marches!

Comme «loisir», nous les filles, et bien… nous devions désherber le cimetière. Une fois ou deux par été. Des gros paniers, des sarcloirs et de l’huile de coude. Puis, nous grattions entre les tombes, nous portions les paniers de mauvaises herbes jusqu’au «ruclon». Nous prenions cela du bon côté, en bavardant et en riant. Le curé nous a apporté, une fois, un petit quelque chose à boire… quel salaire!

Mais alors la Saint Jacques, j’y reviens. Nous y sommes allés souvent. Garçons et filles cette fois, à vélo jusqu’à Bellegarde. Nous partions après la messe bien sûr! La montée de Bataille n’était pas toute goudronnée, les contours étaient pavés. Mais bon, c’était la fête. A la Tsintre nous nous arrêtions un peu, puis Bellegarde, à la Cascade. Peu d’argent en poche, nous buvions peu, mangions sur le pouce, mais alors pour danser, nous étions là, jusqu’à minuit.

Pas trop frais pour rentrer, le lendemain était pénible, mais les souvenirs sont toujours là… et je ne vous dis pas tout!

Anne Marie Yerly