Deché-delé
Kan on di «Ithre dè bou dè vyolon» chin vou adre k’on è dè bon keman, dzoyà è in bouna chindâ.
Mè rèvin oun’afére ke l’é aprê l’i a dè chin bin grantin. To le mondo châ, ke nouthron fre dè Grevire l’è jou èchportâ farmo yin din le mondo. L’è adi dinche ou dzoua d’ora. Nouthrè j’armayi trintson po la têra intyira!
Lè motè voyadjivan grantin è yin. Po chin i dêvechan ithe bin inbortoyè. Lè betâvan adon, din di bochè in bou. Dou bou dè vêre-no, dou bon bou, chêrtin! Bin chur ke apri, lè bochè chobrâvan léva-lé.
Di dzin ke chon jelâ in voyâdzo in Russie, l’an raportâ chin. On bi dzoua, on lutyé, on ke fabrekâvè lè vyolon, l’a trovâ on dè hou viyo bochè ke dzemâvè du grantin din na viye lodze. Chè don apêchu ke chi bou irè dou bou dè… vyolon! N’in d’a fê on inchtrumin ke tsantâvè…