A l’èpâhyo dè la Fitha dè la Montanye è dou Lé, ke ch’è tinyête ou Lé d’Omêna, lè vint’è trè è vint’è katro dou mi dè juyè, Carmen Butsiyi, Dzâtyè Jenny è mè, no j’an j’ou le pyéji dè tinyi on bantsè po prèjintâ è fére a dèkrouvâ nouthron galé patê.

Din ouna kantena bondâye, no j’an kontâ, in patê, di lèjandè in rapouâ avu chi bi Lé d’Omêna. Avu oun’inpartya di dzouno j’akteu gruvèrin, no j’an dzuyê on pachâdzo dè la pithe «Dè la bije, di j’inpou è… tyè onkora?». Lè chpèktateu chon j’ou intrètsantâ è l’an prà fyê di man.

Le dechando, a la vèprâ, no j’an j’ou la vijita di dzoyà barbu dè la Grevire. Dè binda avu là, no j’an tsantâ è rèdzoyi ouna redâye dè kà. No j’an achebin, j’ou l’èpâhyo dè rinkontrâ di patêjan ke vinyan d’ôtrè kotsè dou payi reman. No j’an dèvejâ avu di Valijan, di Vôdouâ, di Jurachyin, mimamin avu on dè Dzenèva, fêrmo intèrèchi dè konyêthre nouthron patê. Chin ke fô règrètâ l’è ke, prou chure a kouja d’on mankèmin dè rèhyâma, lè patêjan d’intche-no chon j’ou râro.

Chin ke l’è chur, l’è ke le chèlà bayivè a ridyeu din le kà di dzoyàjè dzin ke chon vinyêtè no tornâ invela è, avu là, no j’an pachâ ouna fro delé bala fin dè chenanna, borâye dè boun’imeu è dè rijârdè.

Bêrnâ Chaney

Du côté du Lac Noir

A l’occasion de la Fête de la Montagne et du Lac, qui s’est tenue au Lac Noir, les 23 et 24 juillet, Carmen Buchillez, Jacques Jenny et moi, avons eu le plaisir de tenir un stand pour présenter et faire découvrir notre cher patois.

Dans une cantine bondée, nous avons raconté en patois, des légendes en rapport à ce beau Lac Noir. Avec une partie des jeunes acteurs gruériens, nous avons joué un passage de la pièce «De la bise, des impôts et… quoi encore». Les spectateurs furent enchantés et ont bien applaudi.

Le dimanche après-midi, nous avons eu la visite des joyeux Barbus de la Gruyère. En leur compagnie, nous avons chanté, réjouissant tous les cœurs. Nous avons aussi eu l’occasion de rencontrer des patoisants venant d’autres régions du pays Romand. Nous avons parlé avec des Valaisans, des Vaudois, des Jurassiens et même avec un Genevois, fort intéressés de connaitre notre patois. Ce qu’il faut regretter, c’est que, certainement à cause d’un manque de publicité, les patoisants de chez nous furent très rares.

Ce qui est sûr, c’est que le soleil brillait bien dans le cœur des joyeuses personnes qui sont venue nous faire visite, et avec elles nous avons passé une fort belle fin de semaine, pleine de bonne humeur et de rigolades.

Bernard Chaney