Pê hou tin dè pechintè tsalà, la frètyà, on pou la trovâ din lè grantè churfathè, in vela. Fo dre ke chàbrè pâ mé tan dè piti magajin din lè velâdzo. Lè bin damâdzo, ma on pou rin ratinyi, fô chiêdre.

Din le tin, din mon velâdzo, li avê duvè fretchirè è katro magajin por ouna populachyon d’on bokon mé dè katro-thin j’ârmè. A la fretchire d’amon, in dèpye dè cha famiye è dè chon mihyi, Djan Patchi l’avi ouna pachyon. Irè chuti po drèhyi lè tsin. D’ayeu, avu chon frâre François, i èthi minbro fondateu d’la chochyètâ dè drèthâdzo dè tsin dè Bulo.

Nouthron fretchi Djan, l’avi on tsin ke chapalâvè Kora. Mè rapalo, kan alâvo a l’ékoula, d’avi yu chi Kora avu on bicha din le moua. I alâvé cholè vê Madama Mayâ, avu on biyè dè komichyon è la mounêya ou fon dou cha. I ourâvè la deléje avu cha pata, pu dèvan la pouârta, i terivè la punya d’la hyotsèta è la rèthrenâye dou gelin faji chayi Mardjita, la dama dou magajin, pâ dou to èpouiria. On kou le cha inpyâ, Kora rèmodâvè a la fretchire, chin trinâ.

Chin l’è on bi chovinyi, k’ou velâdzo, l’i-ya pâ mé tan dè dzin ke chin rapalon.

Vonvon Kolly

Au magasin avec Kora

Par ces temps de puissante chaleur, la fraîcheur, on peut la trouver dans les grandes surfaces, en ville. Il faut dire qu’il ne reste plus beaucoup de petits magasins dans les villages. C’est bien dommage, mais on ne peut rien retenir, il faut suivre.

Dans le temps, dans mon village, il y avait deux laiteries et quatre magasins pour une population d’un peu plus de 400 âmes. A la laiterie d’en-haut, en plus de sa famille et de son métier, Jean Pasquier avait une passion. Il était habile pour dresser les chiens. D’ailleurs, avec son frère François, il était membre fondateur de la Société de dressage de chiens de Bulle.

Notre fromager Jean avait un chien qui s’appelait Kora. Je me rappelle, quand j’allais à l’école, d’avoir vu ce Kora avec un sac à commissions dans la gueule. Il allait tout seul chez Madame Maillard, avec son billet de commissions et la monnaie au fond du sac. Il ouvrait le portail avec sa patte, puis devant la porte, il tirait la poignée de la clochette et la résonnance du battant faisait sortir Marguerite, la dame du magasin, pas du tout effrayée. Une fois le sac rempli, Kora rentrait à la laiterie, sans s’attarder.

Ceci est un beau souvenir, au village, il n’y a pas beaucoup de gens qui s’en rappellent.

Vonvon Kolly