Dariremin, a Farvagny, le kà d’omo dou Dzubyà l’a fithâ chè dji j’an d’ègjichtanthe. Po l’okajyon, l’an rathinbyâ la tyindzanna dè kà d’omo dou tyinton. In Grevire, no j’in d’an adi dè fyêrta renomâye.

Din mon dzoun’âdzo, a la louye di mohyi on n’intindi tyè di kà d’omo. N’in dé fi partya a pou pri vint’ an. M’è pyéji bin, iro a l’éje, l’avi trovâ ma vouê. Mè chovinyo  k’in mil-nouthin-thinkantè-katro, a Vaulruz, a la fitha di « Céciliennes », le delon dè Pâtyè (i nevechê a patè), din la vêprâ, po la partya pye libra dou programe, no j’avan tsantâ le « Venerabilis Barba Capucinorum » di Katro Barbu. No chin j’ou aplôdi dè djija.

L’é achebin fi partya, trè ou katr’ an d’la « Chorale » dè Bulo, ouna viye chochiètâ, k’la jou chon tin dè glouâre ly-a bin grantin. A chi propou, din lè pâdzè dè la « Grevire » du l’y a mé dè thant’ an, chi kà d’omo lè chovin manchyenâ. Lè bin damâdzo, ma n’a pâ chu chè rènovalâ  è l’a piakâ dè chohyâ l’y a dza bin di j’an. Portan, to l’è pâ fotu. Fo dre ke la bocha dè ha chochiètâ irè bin garnya è ora l’è la vela dè Bulo, avu chi l’ardzin, ke pou rèkonpincha di dzouno tsantèri. Vonvon Kolly

Les chœurs d’hommes

Dernièrement, à Farvagny, le Chœur d’hommes du Gbloux a fêté ses 10 ans d’existence. Pour l’occasion, ils ont rassemblé la quinzaine de chœurs d’hommes du canton. En Gruyère, nous en avons encore de forte renommée.

Dans mon jeune âge, à la tribune des églises on n’entendait que des chœurs d’hommes. J’en ai fait partie à peu près 20 ans. Je me plaisais bien, j’étais à l’aise, j’avais trouvé ma voix. Je me souviens qu’en 1954, à la fête des Céciliennes, le lundi de Pâques (il neigeait à gros flocons), dans l’après-midi, pour la partie plus libre du programme, nous avions chanté le « Venerabilis Barba Capucinorum » des Quatre Barbus. Nous avons été applaudi comme il fallait.

J’ai aussi fait partie, trois ou quatre ans de la Chorale de Bulle, une vieille société qui a eu son temps de gloire, il y a bien longtemps. A ce propos, dans les pages de La Gruyère, d’il y a plus de 100 ans, ce chœur d’hommes est souvent mentionné. C’est bien dommage, mais il n’a pas su se renouveler et il a cessé de souffler, il y a déjà bien des années. Pourtant, tout n’est pas fichu. Il faut dire que la bourse de cette société était bien garnie et maintenant, c’est la Ville de Bulle, avec cet argent, qui peut récompenser de jeunes chanteurs. Vonvon Kolly